СКИЈАЧКИ СКОКОВИ
- Тој е актуелен победник на Светскиот куп, олимписки шампион, светски првак во скијачки скокови и во скијачки летови, победник на „Четирите скокалници“ и светски рекордер. Од другите скијачи скокачи, Мати Никенен ги освои истите трофеи во текот на кариерата, пред околу 40 години
Домен Превц (Словенија) го комплетира т.н. гран-слем на скијачките скокови, откако по натпреварите викендов во Лахти (Финска) го обезбеди и кристалниот глобус, трофејот за победник во генералниот пласман во Светскиот куп (СК) сезонава. По 24 од вкупно 30 натпревари сезонава, тој има недостижни 741 бод предност пред второпласираниот на табелата, Јапонецот Рјоју Кобајаши (за победа во натпревар од Светскиот куп се освојуваат 100 бода).
Така, Превц сега е актуелен победник на Светскиот куп (2026 г.), олимписки шампион (годинава), светски првак во скијачки скокови (од Светското првенство минатата година), светски првак во скијачки летови (од Мундијалот годинава) и победник на традиционалната новогодишна турнеја „Четири скокалници“ (годинава), а тој е и светски рекордер (од лани, со прескокнати 254,5 метри). Сето тоа за помалку од 12 месеци.
Од другите скијачи скокачи, Мати Никенен (Финска) ги освои истите трофеи во текот на кариерата. Тој беше победник на Светскиот куп во 1983, 1985, 1986 и 1988 година, потоа трикратен олимписки шампион, во 1984 (еден златен медал) и во 1988 година (два), светски првак во скијачки скокови во 1982 година, светски шампион во скијачки летови во 1985 година, победник на новогодишната турнеја „Четири скокалници“ во 1983 и во 1988 година и светски рекордер (три светски рекорда во 1984, двапати по 182 и еднаш 185 метра, и два во 1985 година, 187 и 191 м). Н.М.
ИНДИВИДУАЛНИ ПЕХАРИ НА НЕКОИ СКИЈАЧИ СКОКАЧИ
ИМЕ И ПРЕЗИМЕ ЗОИ СП-Н СП-Л СК 4СК СР
Домен Превц 1 1 1 1 1 1
Мати Никенен 3 1 1 4 2 5
Стефан Крафт – 3 1 3 1 1
Еспен Бредесен 1 1 – 1 1 2
Андреас Голдбергер – – 1 3 2 1
Грегор Шлиренцауер – 1 1 2 2 –
Петер Превц – – 1 1 1 1
ЗОИ – Зимски олимписки игри, поединечна конкуренција; СП-Н – Нордиско светско првенство; СП-Л – Светско првенство во скијачки летови; СК – Светски куп; 4СК – Новогодишна турнеја „Четири скокалници“; СР – светски рекорд
ТРОФЕИТЕ НА ДОМЕН ПРЕВЦ
НАТПРЕВАРУВАЊЕ ОБЕЗБЕДЕН ТРОФЕЈ
Светски првак, ски-скокови 8.3.2025
Светски рекордер 30.3.2025
Четири скокалници 6.1.2026
Светски првак, ски-летови 24.1.2026
Олимписки шампион 14.2.2026
Светски куп 6.3.2026
