Новото натпреварување, само во тркачки дисциплини, почнува утре во Кингстон, а годинава ќе има митинзи и во Мајами, Филаделфија и во Лос Анџелес
ПОЧНУВА ГРАНСЛЕМ-СЕРИЈАТА
Четирикратниот олимписки шампион Мајкл Џонсон верува дека неговата атлетска гранслем-серија може да биде „Формула 1 на трките за атлетичари“, откако новото натпреварување, кое почнува утре во Кингстон (Јамајка), ги става ривалствата во првите редови, пишува агенцијата „Ројтерс“.
– Самите атлетичари беа многу критикувани во текот на годините поради тоа што спортот не е попопуларен. И мојот став отсекогаш бил дека атлетичарите си ја вршат својата работа. Останува некој друг да создаде структура што ќе му го претстави тоа на светот, ќе го комерцијализира и ќе го пласира на пазарот – рече Џонсон, кој годинава ќе биде домаќин на митинзи од оваа серија и во Мајами, Филаделфија и во Лос Анџелес.
На овие митинзи ќе има само тркачки дисциплини. Џонсон, кој освои олимписки злата на 200 и на 400 метри во 1996 година и имаше светски рекорди во двете дисциплини, вели дека проширувањето на серијата во Европа и во Азија ќе биде на агендата ако годинашните натпревари покажат успех, пишува „Ројтерс“.
– Ќе се обидам да го премостам овој јаз помеѓу спортот и неговата моментална позиција и неговиот потенцијал, кој мислам дека е огромен. Мислам дека ова би можело да биде УФЦ и Формула 1 на трките за атлетичари – рече Џонсон. Н.М.
