Во Стара Пазова ќе работиме на подобрување и корекција во техничко-тактичкиот дел од играта за максимално подготвени да ги дочекаме натпреварите од продолжението на сезоната, како и во Купот на Македонија, вели тренерот на Металург, Зоран Кастратовиќ
Ракометарите на Металург в понеделник почнуваат со реализирање на третата и завршна фаза од подготовките за продолжување на сезоната во домашното првенство и Купот на Македонија. Првата фаза од подготовките металурзите ја реализираа на турнејата во Франција, каде што, покрај предвидените тренинзи, одиграа и четири пријателски натпревари на два силни турнири против француски прволигаши. Во салата „Автокоманда“ во Скопје, металурзите работеа на подигнувањето на формата на физички план, а финалните корекции во техничко-тактички дел од играта, Металург ќе ги одработи во Стара Пазова (од 17 до 22 февруари), каде што, покрај тренинзите, избраниците на тренерот Зоран Кастратовиќ ќе одиграат и два пријателски дуела со српскиот првак Војводина (18 февруари) и хрватскиот вицепрвак Нексе (20 февруари).
– Во изминативе три седмици, откако се вративме од Франција, па досега, работевме на подигање и подобрување на физичката подготвеност на играчите и можам да кажам дека сум презадоволен од нивната посветеност и дисциплина со која ги одработија тренинзите. Во следните шест дена во Стара Пазова ќе работиме на подобрување и корекција во техничко-тактичкиот дел од играта за максимално подготвени да ги дочекаме натпреварите од продолжението на сезоната, како и во Купот на Македонија. Во рамките на завршните подготовки ќе одиграме и две контролни средби со Војводина и со Нексе, кои, пак, ќе ни помогнат во детектирањето и отстранувањето на ситните недостатоци во играта – ни изјави тренерот на Металург, Зоран Кастратовиќ.
Според календарот на Ракометната федерација на Македонија (РФМ), продолжението од сезоната во домашното првенство е предвидено за 1 март, така што во мечот од 15-то коло, ракометарите од Автокоманда ќе ѝ гостуваат на Струга. Металург ја има улогата на лидер на табелата со 38 бода, со 12 победи и две реми-средби во есенскиот дел.
