Бостон е првиот тим во НБА што имал 60 шута за три поена на пет меча во иста сезона и е на 19 погодени тројки помалку од рекордот на НБА-лигата, која е блиску до најдобри остварувања за погодени и за обиди за тројки. Чикаго постави клупски рекорд, во трка да ги соборат своите рекорди се уште 14 тима, а сезонава може да има и најголем број играчи со барем сто погодени тројки
КОШАРКА
Бостон речиси сигурно ќе постави рекорд неделава, со што бранителот на титулата во кошаркарската НБА-лига ќе оди во плејофот со рекорди во лигата за постигнати три поени и за обиди за три поени во една сезона, пишува агенцијата „Асошиејтед прес“ (АП). Бостон има најмалку 50 удари за тројка на натпревар 36 пати сезонава и огромни 29 победи и седум порази во тие мечеви откако шутна 62 пати во победата над Мемфис во понеделникот.
– Се работи само за тоа да го земете она што ви го дава одбраната – рече тренерот на Бостон, Џо Мазула.
Бостон сега е првиот тим во историјата на НБА што имал 60 шута за три поена на натпревар пет пати во иста сезона. Тие имаат 1.344 тројки сезонава, само 19 помалку од рекордот на Голден стејт, поставен пред две сезони. Тие сезонава имаа и 3.636 обида за поени од зад линијата, 85 помалку од рекордот што Хјустон го постави во сезоната 2018/2019. Бостон е еден од 15-те клуба што сезонава се подготвени да ги соборат клупските рекорди или во три поени или во обиди за три поени или во двете категории. Некои тимови, Чикаго, Кливленд, Портланд и Сан Антонио, веќе поставија еден или два клупски рекорда.
НБА-лигата ќе постави рекорд за три поени. Повторно. Сега има 30.000 тројки четврта сезона по ред, а НБА е на пат да ги собори тековните вкупни рекорди во една сезона за постигнати (31.579 во минатата сезона) и за обиди за три поени (86.535 во сезоната 2021/2022). Тоа ќе биде 17-ти пат во претходните 22 сезони НБА да има повеќе тројки од кога било претходно. Тимовите пробуваат 6,8 отсто повеќе тројки, во просек отколку лани, пишува АП.
Речиси секој тим шутира тројки со голема брзина. Чикаго никогаш немал повеќе од 941 тројка во една сезона, а сега има 1.171. Во трка да ги соборат клупските рекорди за погодени тројки, за обиди или и двете во една сезона се Бостон, Бруклин, Шарлот, Кливленд, Детроит, Лос Анџелес лејкерс, Мемфис, Мајами, Минесота, Оклахома, Филаделфија, Феникс, Сан Антонио и Вашингтон.
Рекордот за играчи што постигнале сто тројки во една сезона е 125, поставен лани, а по мечевите во неделата 118 кошаркари имаа најмалку 100 постигнати тројки сезонава. Во сезоната 2014/2015 имаше само 57 играчи што постигнаа сто тројки. Оттогаш тој број се зголеми повеќе од двојно. Н.М.
