Најголемото изненадување во првото коло на ЕП го приреди Грузија, која во првиот натпревар од групата Ц убедливо го совлада актуелниот шампион Шпанија, со 83-69
ЕВРОПСКО ПРВЕНСТВО ВО КОШАРКА ЗА МАЖИ
Во својот прв натпревар на 42. Европско првенство (ЕП), кое се одржува во Финска, Полска, Летонија и Кипар до 14 септември, репрезентацијата на Словенија загуби со 95-105 од Полска (четвртопласирана на последното ЕП) и покрај извонредната игра на нејзиниот најдобар играч. Имено, Лука Дончиќ доминираше на паркетот постигнувајќи 34 поени, четири скока, девет асистенции и пет украдени топки, што претставува историски резултат. На официјалната веб-страница, ФИБА го означи тоа, истакнувајќи дека Дончиќ е првиот играч во историјата на ЕП што постигнал ваков ефект откако се следат детални статистики. Сепак, неговиот извонреден настап не беше доволен за Словенија да го избегне поразот од Полска, која рутински ја контролираше играта до крајот. Со овој триумф, Полјаците ја потврдија својата добра форма по првото коло, додека Словенците сега ќе треба брзо да закрепнат.
Франција очекувано ја победи Белгија со 92-64 во Катовице, во натпревар од првото коло од групата Д, и не дозволи изненадување. Најефикасни играчи кај Французите со по 12 поени беа Ели Окобо и Билал Кулибали. Прв стрелец кај Белгијците беше Ханс Ванвајн со 13 поени, додека Исмаел Бако уфрли 11 поени. Французите во следното коло ќе играат против Словенија, додека Белгија ќе се соочи со Исланд.
Репрезентацијата на БиХ го победи Кипар со 91-64 во Лимасол, во натпревар од првото коло од групата Ц. Најефикасен играч кај Босанците беше Јусуф Нуркиќ со 18 поени и шест скока, а кај Кипраните Константинос Симицис со 22 поена. Следен ривал на БиХ ќе биде Шпанија, додека Кипар го очекува дуел со Грција. Сепак, најголемото изненадување во првото коло на ЕП го приреди Грузија, која во првиот дуел од групата Ц во Лимасол убедлива го совлада актуелниот европски шампион Шпанија со 83-69. Најефикасни во победничкиот состав беа Сандро Мамукелашвили со 19, Гога Битадѕе со 15 и Торнике Шенгелија со 13 поени, а кај поразените Санти Алдама со 12 и Дарио Бризуела со 11 поени. Првите четири селекции од четирите групи одат во втората фаза. Г.И.
Резултати, 1. коло
ГРУПА Ц (Кипар)
Грузија – Шпанија 83-69
БиХ – Кипар 91-64
Грција – Италија 75-66
ГРУПА Д:
Резултати, 1. коло
Израел – Исланд 83-71
Белгија – Франција 64-92
Словенија – Полска. 95-105
