На инаугуративното Светско клупско првенство на ФИФА годинава во САД, 32 од најдобрите клупски тимови ќе се натпреваруваат за новиот трофеј
ФУДБАЛ
Шефот за глобален фудбалски развој на Светската фудбалска федерација (ФИФА), Арсен Венгер, изјави дека новото клупско Светско првенство (СП) ќе ѝ помогне на ФИФА да се приближи до целта фудбалот да стане вистински глобален бидејќи дава „можност за клубовите да станат посилни“, пишува ФИФА. На Светското клупско првенство годинава првпат ќе настапат 32 од најдобрите тимови на планетата, во САД, летово.
Со милиони гледачи, кои се очекува да присуствуваат на натпреварите, и милијарди низ светот, тоа ќе го одбележи првиот пат клупскиот фудбал да го обедини светот со пласирани клубови што ги претставуваат сите шест конфедерации, пишува ФИФА.
– Сакаме да го развиеме клупскиот фудбал насекаде во светот и Светското клупско првенство на ФИФА е можност клубовите да станат посилни. Во моментов најсилните клубови се во Европа и сите го знаат тоа. Сакаме силни фудбалски клубови насекаде во светот затоа што тоа е дел од нашата програма, да го направиме фудбалот голем насекаде, а Светското клупско првенство може да придонесе клубовите да бидат посилни – рече Венгер на настанот во седиштето на Египетската фудбалска асоцијација во главниот град Каиро, пренесе Светската фудбалска федерација.
Клубовите се пласираа за турнирот или со освојување на врвното клупско натпреварување на нивната конфедерација или преку патеката за рангирање, која се одредува според перформансите на клубот во нивното водечко континентално натпреварување во текот на четиригодишниот квалификациски период. Тоа значи дека шампионите на секоја конфедерација ќе бидат претставени, давајќи им на клубовите единствена можност да се измерат со врвните ривали од други региони и континенти, пишува Светската фудбалска федерација. Н.М.
