Јунскиот прозорец не е идеален за никого, особено за играчите. Мислам дека ФИФА е таа што можеби може да го усогласи календарот и можеби може да најде празнина каде ќе го ставиме овој прозорец… за добро на играчите, рече селекторот на Англија
Томас Тухел вели дека јунскиот меѓународен прозорец нема смисла за селекторите поради драстично различните распореди на членовите на фудбалски репрезентации, со годинашниот прозорец комплициран со проширеното клупско Светско првенство (СП), пишува британски „Индепендент“. Селекторот на Англија побара од Светската фудбалска федерација (ФИФА) да го „усогласи календарот“ за „доброто на играчите“. Тухел рече дека тој ќе биде еден од многуте селектори принудени да се справуваат со составот составен од некои играчи кои само што играле во финалиња на европските купови, други што отсуствуваат со недели, а некои потоа веднаш ќе треба да заминат во САД на турнир што трае еден месец, пишува „Индепендент“.
Сезоната во Премиер-лигата завршува на 25 мај, финалето на Лигата на шампионите е на 31 мај, а Англија потоа патува во Андора на квалификациите за Светското првенство на 7 јуни, пред да го пречека Сенегал дома на 10 јуни. Светското клупско првенство треба да почне само пет дена подоцна, пишува „Индепендент“. Англиските репрезентативци од Челси, Манчестер сити, Баерн и од Реал Мадрид можат да пристигнат во САД три дена пред нивните први натпревари на СП, наместо стандардните пет. Дали играчите можат порано да заминат на СП може да зависи од дискрецијата на Тухел, но тоа го сумира едно од многуте прашања со модерниот фудбалски календар, пишува „Индепендент“.
– Тоа е еден квалификациски натпревар и можеби шанса малку да се смени составот и да им се даде шанса на фудбалерите што не се вклучени во Светското клупско првенство да играат пријателски натпревар. Ќе видиме. Јас сум само загрижен за паузата на играчите. Не сум толку загрижен за бројот на мечеви што фудбалерите ги играат вкупно. Повеќе е тоа што никогаш нема вистинска пауза од три до четири недели. Можеби имаат три недели одмор, но можеби по пет дена ќе играат друго натпреварување. Тоа е проблемот.
Тие треба да имаат минимум три или три и пол недели подготовка и тогаш ќе биде подобро за сите. Да се биде клупски тренер или селектор, за јунскиот прозорец на ФИФА може да се дебатира, ако има смисла. Не сите играат финале во Лигата на шампионите или клупско финале, така што има незгоден период за еден играч. Имаат 10 или 14 дена пауза, потоа одат за репрезентацијата, потоа им даваат малку одмор, но мислат: „Другите играчи се на одмор. Треба да се вратам“. Значи, јунскиот прозорец не е идеален за никого, особено за играчите. Мислам дека ФИФА е таа што можеби може да го усогласи календарот и можеби може да најде празнина каде ќе го ставиме овој прозорец… за добро на играчите – рече Тухел.
Капитенот на Англија, Хари Кејн, рече дека играчите на крајот не се слушаат.
– Постојат аргументи од гледна точка на клубот, да се заработат повеќе пари, бидејќи веројатно заработуваме повеќе пари. Исто така, постои благосостојба на играчите. Значи, тоа е навистина тежок баланс. Мислам дека играчите не се слушаат толку многу, ако сум целосно искрен. Но исто така, како што реков, секој го сака своето парче, својот турнир, својата награда… Но, тоа е она што е. Сакам да играм фудбал, затоа никогаш нема да се жалам што играм фудбал. Мислам дека ако добро го менаџираш, со тренерите, селектор, клубот, постојат начини да се одмориш повеќе во одредени моменти. Но тоа не е лесно прашање, не е лесна ситуација. Мислам дека може да има рамнотежа од двете страни, но ќе треба да видиме како ќе се одвива тоа – рече Кејн. Н.М.
