Покривајќи над 180 меча во трите натпреварувања, техничките набљудувачи го дадоа својот придонес за да помогнат во идентификувањето и истражувањето на клучните трендови што ги обликуваа европските купови во сезоната 2023/2024
ФУДБАЛ – АНАЛИЗА НА УЕФА ЗА МИНАТАТА СЕЗОНА НА ЕВРОПСКИТЕ КУПОВИ
Компактна одбрана, висок притисок и извонредни поединци беа само некои од клучните трендови што ги обликуваа Лигата на шампионите (ЛШ) за мажи и за жени и Лига Европа, објави Европската фудбалска унија (УЕФА). Покривајќи над 180 меча во трите натпреварувања, техничките набљудувачи го дадоа својот придонес за да помогнат во идентификувањето и истражувањето на клучните трендови, кои ги обликуваа клупските натпреварувања на УЕФА во сезоната 2023/2024.
Анализата за Лигата на шампионите ги вклучува играта на Борусија Дортмунд, влијанието на Џуд Белингам и компактната одбрана на Реал Мадрид. И покрај сета возбуда поради доцните голови на Реал Мадрид, нивната стратегија при игра надвор од посед на топката, исто така, им даде причина за размислување на техничките набљудувачи на УЕФА и единицата за анализа на перформансите додека ги оценуваа шампионите на Карло Анчелоти, пишува УЕФА. Во четврт-финалето со Манчестер сити, Реал Мадрид одржуваше компактна форма низ теренот, покажувајќи одлична позициска свест.
– Имаше неколку моменти на одлична одбрана со низок блок од Реал Мадрид кога Манчестер сити ја движеше топката и тие можеа да притиснат без да прават прекршоци или да дозволуваат удари од далечина – рече набљудувачот на натпреварот, Герет Саутгејт, пренесе УЕФА.
Во првиот полуфинален натпревар со Баерн во Минхен, Реал Мадрид помина повеќе од една третина од целокупното време без посед (38 отсто) бранејќи се во среден блок. Како што е идентификувано од техничките набљудувачи на УЕФА, ова вклучува покривање простор наместо играчи, што генерално е тренд во Лигата на шампионите.
– Кога топката се движи, тимот се движи. Ако сте во среден блок, го браните просторот, па нормално сте многу тесни и компактни. Многу е важно да ги блокирате линиите, особено за играчите од средниот ред, кои се движат помеѓу одбраната и средниот ред – рече Џовани ван Бронкхорст, друг член на групата набљудувачи, пренесе УЕФА.
Прегледот на техничките набљудувачи на УЕФА на Лигата на шампионите за фудбалерки ја истакнува сезоната на конкурентност и непредвидливост, како и извонредните поединки на Барселона. Групната фаза од 48 натпревари силно навести дека ЛШ оди кон нова ера на конкурентност и непредвидливост. Фаворитите пред турнирот беа елиминирани, Ајакс, Бенфика и Бран дебитираа во четврт-финалето и првпат во 23-годишната историја на натпреварувањето немаше германски тим меѓу најдобрите осум, пишува УЕФА. Од другата страна, имаше два нордиски претставника во четврт-финалето првпат од сезоната 2016/2017, а техничките набљудувачи беа фасцинирани кога видоа дека Бран и Хекен ги постигнаа своите цели со многу различни средства.
Прегледот за Лига Европа го прикажува пресингот човек на човек на Аталанта и флексибилниот пристап на Баер за градење игра како дел од нивната длабинска анализа. За Аталанта да изврши притисок високо на теренот, тимот на Џан Пјеро Гасперини беше подготвен да одигра еден на еден преку својата бековска линија. Подготвеноста на Аталанта да игра без покритие и поддршка преку бековската линија беше во контраст со многу популарни одбранбени системи, кои вклучуваат резервен дефанзивец, пишува, меѓу другото, Европската фудбалска унија. Н.М.
