Од 21 играч што триумфираа на СП 2017, Андерсон е единствениот што повеќе не игра фудбал. Тој работи за независен финансиски советник, каде што го води спортскиот оддел. Половина од своето време го поминува исклучиво со спортисти, главно фудбалери, помагајќи им да донесат финансиски одлуки врз основа на соодветни информации за да ја максимизираат својата заработка од кратка кариера, пишува „Би-би-си“
Не се случува секој ден светски фудбалски првак да влезе во кафуле во центарот на Манчестер, сепак, нема мешаница, нема потпишување автограми или фотографирање со навивачи. Работите се одвиваа поинаку за Куртис Андерсон, пишува „Би-би-си“. Поранешниот голман на Манчестер сити, кој со Англија го освои Светското првенство (СП) за фудбалери до 17 години во 2017 година, има можност да го пие своето кафе во релативен мир додека објаснува зошто се откажал од својот сон и наместо тоа станал финансиски советник. Од 21 играч што триумфираа на СП, само Андерсон повеќе не игра фудбал. За разлика од повеќето во неговата сегашна област, Андерсон ги користи своите искуства во фудбалот за да им помогне на млади професионални фудбалери. Тој работи за независен финансиски советник, каде што го води спортскиот оддел. Половина од своето време го поминува исклучиво со спортисти, главно фудбалери, помагајќи им да донесат финансиски одлуки врз основа на соодветни информации за да ја максимизираат својата заработка од кратка кариера, пишува „Би-би-си“.
– Буквално можете да им ги промените животите на луѓето со тоа што ќе го отстраните стресот од парите. Појаснувањето на работите и помагањето ме мотивираат. Сакам да им помогнам на што е можно повеќе луѓе – рече Андерсон за „Би-би-си“.
Не толку одамна, 24-годишникот беше во истата позиција како и оние на кои сега им помага. На 28 октомври 2017 година, Андерсон стана светски шампион на СП до 17 години во Индија. Англија имаше состав во кој беа идните редовни играчи на Премиер-лигата, Фил Фоден, кој беше прогласен за играч на турнирот, Морган Гибс-Вајт, Конор Галагер, Калум Хадсон-Одои и Марк Гуехи, а ја победи Шпанија со 5-2 по 0-2. Андерсон беше на врвот на светот, но, според неговото признание, стана нетрпелив. Бараше трансфер во потрага по поголема минутажа, но уште беше во Сити кога преодниот рок се затвори откако не успеа заемот во клуб од дивизијата Чемпионшип. Со малку опции, Андерсон одлучи да му се приклучи на американскиот Шарлот во март 2019 година. Три месеци подоцна тренерот што го ангажира Андерсон беше отпуштен, а тој немаше минутажа, пишува „Би-би-си“.
– Се осврнувам и си мислам, на 18 години, за што брзав? Бев во толку очајно брзање да направам сѐ. Се вратив по СП и очекував сѐ сега. Ги гледав другите играчи што правеа и не го вреднував навистина патот на кој бев. Играјќи за Сити и за Англија мојата траекторија ќе беше директно нагоре – вели тој.
По една година во Викомб, Андерсон отиде во аматерска лига пред да се пензионира во 2023 година.
– Искрата за фудбалот едноставно ја снема. Немав ист поттик и љубов како што имав пет години претходно. Одлуката целосно да престанам да играм дојде доста лесно. Кога се осврнувам на мојата фудбалска кариера, луѓето ме прашуваат дали жалам, но апсолутно не. Фудбалот ми даде апсолутно сѐ, во однос на експонираноста и можноста да созреам навистина млад – вели тој.
Кога карантинот поради коронавирусот го остави Андерсон без можност да најде нов клуб, тој почна да се прашува како се намалиле парите што ги заработил во Сити.
– Се сеќавам дека имав 17 години и не знаев што да правам со парите, тоа беше застрашувачка работа – вели тој.
Андерсон положи испити по сметководство и финансии откако контактира со Здружението на професионални фудбалери за да добие насоки. Тој одлучи дека тој пат не е за него, што го наведе да следи финансиски советник во близината на куќата на неговите родители. Оттогаш работи во финансиско планирање и советување, одбивајќи неколку понуди да се врати во фудбалот. Неговиот нов пат обезбеди ниво на контрола и безбедност, како и цел, нешто што со играњето фудбал во пониските лиги не можеше да го постигне, пишува „Би-би-си“.
– Во Викомб добивав прашања од постари играчи. Сфатив дека има недостиг од поддршка за финансиите во фудбалот. Нема доволно образование, водство и поддршка за млади со високи заработки. Ако сте играч од пониската лига, вашиот непосреден приоритет треба да биде планирањето на животот по фудбалот. Ако го средите тоа, можете да се подготвите себе и вашето семејство за години однапред. Гледам што знам сега и чувствувам дека треба да им помогнам на што е можно повеќе луѓе во фудбалот – вели тој.
Но кога ги гледа своите поранешни соиграчи од Англија како успеваат во врвот на фудбалот, дали има некакво жалење?
– Горд сум што ги гледам како се снаоѓаат толку добро, не мислам „би сакал да го правам тоа“ или „што можеше да биде“. Немам жалење и не завидувам. Едноставно престанав да уживам во тоа. Кога ќе ја погледнам мојата фудбалска кариера, таа ми даде можност да го правам она што го правам сега. Нема многу финансиски советници под 25 години или барем нема многу добри – вели Андерсон. Н.М.
