Барселона со три тима, Арсенал со два и уште 11 клуба со по еден тим останаа во трка по трите врвни клупски трофеи сезонава, за европски првак за фудбалери, фудбалерки и за младинци.
Најмногу клубови има Англија, три (Арсенал во две конкуренции, Астон вила и Челси), по два имаат Шпанија (Барселона во три конкуренции и Реал Мадрид), Франција (Пари сен Жермен и Лион), Германија (Баерн и Борусија Дортмунд), а по еден Холандија (АЗ), Австрија (Салцбург), Турција (Трабзонспор) и Италија (Интер).
Во средата се комплетираа полуфиналињата во Младинската лига на Европската фудбалска унија (УЕФА), а двојките се АЗ (Холандија) – Барселона (Шпанија) и Салцбург (Австрија) – Трабзонспор (Турција). Ќе се игра по еден натпревар, на неутрален терен, во седиштето на УЕФА, во Нион (Швајцарија). Минатата недела во Лигата на шампионите (ЛШ) за фудбалерки се оформија полуфиналиња, а ќе се сретнат Барселона – Челси и Арсенал – Лион. Од претходно се познати четвртфиналните дуели во Лигата на шампионите за фудбалери, а двојките се Пари сен Жермен – Астон вила, Арсенал – Реал Мадрид, Барселона – Борусија Дортмунд и Баерн – Интер.
Во игра за нови трофеи останаа два актуелни европски првака, Реал Мадрид (ЛШ за фудбалери) и Барселона (ЛШ за фудбалерки). Н.М.