УЕФА
- Годишните приходи првпат ќе ја пробијат бариерата од 30 милијарди евра, пишува УЕФА
Приходите на европскиот клупски фудбал се на пат првпат да ја надминат границата од 30 милијарди евра, но зголемените трошоци значат дека рекордните финансии не се претвораат автоматски во профитабилност, пишува Европската фудбалска унија (УЕФА). Ова се два од насловите од најновото издание на извештајот на УЕФА за европскиот клупски финансиски и инвестициски пејзаж, кој предвидува дека приходите за 2025 година ќе ги надминат рекордните 28,6 милијарди евра во 2024 година, продолжувајќи го деценискиот тренд на финансиски раст, пишува УЕФА. Извештајот ги истражува клучните трендови на индустријата што продолжува да расте, испитувајќи како клубовите се приспособуваат, каде се појавуваат нови можности и какви предизвици стојат пред неа додека фудбалот продолжува да расте на сѐ поглобалната сцена.
Од 2015 година, приходите од европскиот клупски фудбал се зголемија за повеќе од 13 милијарди евра, поттикнати од зголемените награди од натпреварите на УЕФА, правата за емитување, комерцијалните партнерства и од приходите од билети. Во истиот период, приходите од трансфери пораснаа за 211 проценти, што ги нагласува континуираниот глобален дострел и комерцијалната привлечност на тој спорт.
– Ова издание на извештајот на УЕФА за европските клупски финансии и инвестиции е доста посебно. Не само што дава јасна слика за моментните финансии на европскиот клупски фудбал туку прави и чекор назад за да размисли за тоа како се развивала играта во претходните 10 години. Она што го покажува извештајот е охрабрувачко. По една деценија што вклучуваше еден од најтешките периоди со кои се соочија нашиот спорт и општеството, европскиот фудбал се најде во силна позиција. И покрај бучавата, и покрај притисокот, и покрај сомнежите на некои, иднината на европскиот фудбал останува светла. Деценијата што претстои ќе донесе нови притисоци, но и реални можности. Со добри сознанија, како оние што ги дава овој извештај, европскиот фудбал може поефикасно да се подготви и да работи заедно за да поддржи здрава и успешна иднина – рече претседателот на УЕФА, Александер Чеферин.
И покрај силниот раст на приходите, извештајот нагласува и дека самото зголемување на приходите не ја опфаќа сложеноста на моментната финансиска средина на фудбалот. Многу клубови продолжуваат да се справуваат со зголемувањето на оперативните трошоци и проширувањето на структурите на персоналот. Платите на тие што не се играчи, вклучувајќи ги техничкиот, административниот, комерцијалниот и оперативниот персонал, се зголемија за 42 отсто меѓу 2021 и 2024 година, а другите оперативни трошоци, исто така, нагло се зголемија, за кои се предвидува дека ќе сочинуваат 36 проценти од вкупните приходи во 2025 година, пишува УЕФА. Сепак, клубовите успешно се фокусираа на управувањето со нивната најголема точка, платите на играчите. По години стрмни зголемувања, растот на платите на играчите се стабилизира на 2-3 отсто годишно, потпомогнат од спроведувањето на регулативите за трошоците на екипата, а во меѓувреме, клубовите, исто така, станаа поефикасни во зачувувањето на вредноста на средствата со намалување на бројот на фудбалери што заминуваат на крајот од нивните договори без надомест за трансфер, пишува УЕФА.
Финансиската 2024 година означи враќање на оперативната профитабилност за клубовите од највисоките лиги во Европа, прв таков резултат за пет години, поттикнат од закрепнувањето на приходите и рекордните профити поврзани со трансферите, а европскиот фудбал, исто така, продолжува да привлекува значителен интерес на инвеститорите, пишува УЕФА. Гледајќи напред, европскиот пејзаж за клупски финансии и инвестиции проектира уште една година со силни финансиски перформанси, со клубови на добар пат да постигнат нови максимуми во приходите, комерцијалните приходи и капиталните инвестиции, а Европската фудбалска унија, исто така, нагласува дека избалансираниот раст, одржливата контрола на трошоците и транспарентното управување се од суштинско значење за обезбедување долгорочна стабилност на фудбалот, пишува УЕФА. Како што финансискиот пејзаж станува пософистициран и поконкурентен, отпорноста на фудбалот ќе зависи од одржувањето рамнотежа помеѓу амбицијата, инвестициите и одговорноста, пишува УЕФА. Н.М.
