Сакам тим полн со лидери, бидејќи лидерите размислуваат како тренери. Тие не размислуваат егоистички само за себе, тие размислуваат за општото добро, исто како што го прави тоа тренерот, рече Раниери, тренерот на Рома, која е во серија од 10 меча без пораз
Клаудио Раниери ја презеде Рома во средината на ноември лани, а сега италијанскиот фудбалски прволигаш е во серија од 10 меча без пораз во Серија А и се пласира во осминафиналето на Лига Европа, пишува агенцијата „Асошиејтед прес“ (АП). Рома беше четири бода над зоната за испаѓање кога Раниери беше ангажиран како трет тренер на клубот во сезоната, а сега е на деветтото место и на дофат на место на табелата што носи настап во европските купови за идната сезона.
– Имаме одлични играчи и тие го покажуваат тоа – рече Раниери (73), пренесе АП.
Пред Пауло Дибала да постигне два гола во победата со 3-2 на дуелот со Порто во Лига Европа во минатата недела, Раниери разговараше за тренерскиот пристап, кој, меѓу другите достигнувања, му помогна да го води Лестер до неверојатна титула во Премиер-лигата во 2016 година, пишува АП.
– Во фудбалот, и сега и во минатото, карактерот и личноста се основни. Играчот мора да го има, инаку не може да го искаже целиот свој потенцијал. Сакам такви играчи. Сакам тим полн со лидери, бидејќи лидерите размислуваат како тренери. Тие не размислуваат егоистички само за себе, тие размислуваат за општото добро, исто како што го прави тоа тренерот – рече Раниери.
Дибала немаше постигнато гол на девет натпревари по ред во Лига Европа пред натпреварот со Порто.
– Според законот за бројки, тоа треба да се промени – рече Раниери во пресрет на натпреварот, пренесе АП.
Последниот пораз на Рома во италијанската лига беше во Комо на 15 декември, еден месец откако беше ангажиран Раниери. А Рома в недела му е домаќин токму на Комо.
– Комо е прекрасен тим со тренер што за неколку години ќе биде меѓу најдобрите во европскиот фудбал – рече Раниери, мислејќи на Сеск Фабрегас, пишува АП.
Договорот на Раниери предвидува дека тој ќе остане како специјален советник во Рома и по оваа сезона и ќе помогне во изборот на постојан тренер. Но спортскиот директор на Рома, Флорент Гисолфи, посочи дека сака Раниери да остане, пишува АП.
– Од моментот кога пристигна, благодарение на неговото искуство, тој знае како да го извлече најдоброто од секој играч. Тој го прави најдоброто за тимот и не е важно какво име имате. Сите имаме исти шанси да играме ако тренираме добро – рече Дибала за Раниери, пренесе АП. Н.М.
