Во последната деценија успехот во Премиер-лигата е нераскинливо поврзан со поседот на топката. Но Нотингем форест и Борнмут покажуваат дека постои поинаков начин за победа. Во моментов поседот на топката не мора да значи контрола. Пресингот е подобар и посистематизиран од кога било досега, предизвикувајќи рекорден број големи грешки. Статистиката на „Опта“ покажува дека акциите што почнуваат на помалку од 40 метри од голот се зголемени, а брзите контранапади се на највисоко ниво на сите времиња во Премиер-лигата. Моќта им е таква што гостинските тимови цветаат до тој степен што предноста на домашен терен речиси ја нема, пишува „Индепендент“
ФУДБАЛ
Поседувањето е дефинирано како „имање или контролирање“ и можеби вториот збор најдобро ја сумира филозофијата во фудбалот, ако имаш посед, имаш контрола. „Можеби еден ден ќе ги променат правилата“, рече еднаш Пеп Гвардиола со насмевка. „Но мислам дека за да постигнеш гол, потребна е топка“, ја пренесува изјавата на Гвардиола британски „Индепендент“.
Сепак, во англиската Премиер-лига сезонава има сѐ повеќе докази дека тимовите што навистина имаат контрола се оние без топка. Тие се оние што ги водат своите противници во лажно чувство на сигурност, кои можат да украдат топка во секој момент, кои можат за неколку секунди да претворат старт на половина од теренот во шут кон голот, пишува „Индепендент“. Ги видовме знаците сезонава. Нотингем форест е трет во лигата, а, сепак, е на дното според поседот на топката, со 40 проценти, некако како да се чини дека Борнмут доминира на повеќето натпревари со само 47 проценти, Тотенхем во просек има 57 отсто посед на топката и има ист број бодови како Евертон, кој во просек има само 41 отсто, пишува „Индепендент“.
Во моментов поседот на топката не мора да значи контрола. Пресингот е подобар и посистематизиран од кога било досега, предизвикувајќи рекорден број големи грешки. Фудбалот во Премиер-лигата сега е преполн со нив, откако имаше 329 грешки што доведоа до шут кон голот во минатата сезона, таа бројка сезонава е 482 и е на пат да биде речиси удвоена во однос на претходната сезона.
Статистиката на „Опта“ покажува дека акциите што почнуваат на помалку од 40 метри од голот се зголемени, а брзите контранапади што почнуваат од својата половина на теренот се на највисоко ниво на сите времиња во Премиер-лигата. Моќта им е таква што гостинските тимови цветаат до тој степен што предноста на домашен терен речиси ја нема.
Не постои единствена тактика што ја користат тимовите со низок посед, ниту една стратегија што ја освои лигата. Нотингем форест ги привлекува тимовите кон сопствениот шеснаесетник и се брани со голема успешност, откако тимот на Нуно Еспирито Санто е на првото место за расчистувања на топката и на второто за стартови во нивната одбранбена зона. Потоа тој тим лансира брзи напади во слободниот простор, како оној на мечот со Тотенхем во декември кога Морган Гибс-Вајт истрча преку центарот со топката пред неговите нозе и по уште три допира тимот постигна гол, пишува „Индепендент“. Кристал палас, пак, притиска високо под Оливер Гласнер, а Борнмут лови во организирани групи. Тие поставија софистицирана мрежа од стапици дизајнирани да изнудат лошо додавање. Борнмут сезонава искористи 40 грешки од противниците, убедливо најмногу од која било екипа во лигата.
Сето ова е природен еволутивен одговор на желбата за посед на топката што го зафаќа фудбалот веќе 15 години, откако тимот на Барселона на Гвардиола ја промени играта, пишува „Индепендент“.
– Фудбалот еволуира многу, многу брзо. Она за што зборувавме пред десет години, денес е сосема поинаку, дури и по четири години – изјави во јануари за „Индепендент“ менаџерот на Борнмут, Андони Ираола.
Манчестер сити на Гвардиола загуби девет првенствени натпревари сезонава, вклучувајќи и од Нотингем форест и од Борнмут, а противниците подготвуваат подобри планови за да ги победат, пишува „Индепендент“.
– Повеќе тимови користат маркирања човек-на-човек на нашите изведувања од голот, тие се поагресивни. Претходно беа повнимателни. Сега тимовите се многу храбри – рече Гвардиола сезонава.
Тој рече дека играта се приспособува и еволуира далеку од неговата идеологија, станувајќи сѐ подиректна, бидејќи тимовите ја жртвуваат контролата за поинаква игра.
– Денес модерниот фудбал е начинот на кој игра Борнмут, на кој игра Њукасл, на кој игра Брајтон. Модерниот фудбал не е толку позициониран – рече Гвардиола.
Ништо од ова не е дефинитивно. Помалиот број бодови за тимовите гладни за посед во Премиер-лигата не значат дека фудбалот со посед не функционира. Во Германија, Италија, Франција и во Шпанија актуелните лидери во табелите се исто така лидери во посед на топката (Баерн, Интер, ПСЖ и Барселона), пишува „Индепендент“. Сепак, во моментов постои вистинска динамика со оние тимови од Премиер-лигата што поминуваат повеќе време во лов отколку во додавања.
Можеби тоа е само фаза. Во природниот еволутивен циклус на фудбалот ќе има игра за тактиката на Нотингем форест. Но ветришта на промени несомнено дуваат низ Премиер-лигата. Ретко било толку опасно да се има топката, пишува „Индепендент“. Н.М.
