Актуелниот европски шампион, Пари Сен Жермен, ќе има тешка задача да го одбрани тронот, оти во првата фаза ќе игра против Баерн Минхен, Аталанта, Тотенхем и Њукасл дома, како и против Барселона, Леверкузен, Спортинг и Атлетик Билбао на гост
ФУДБАЛ – ПО ЖДРЕПКАТА ЗА ЛИГАШКАТА ФАЗА ВО ЛШ
Актуелниот европски фудбалски шампион, француски Пари Сен Жермен, ќе има тешка задача да го одбрани тронот, оти во првата фаза ќе игра против Баерн Минхен, Аталанта, Тотенхем и Њукасл дома, како и против Барселона, Леверкузен, Спортинг и Атлетик Билбао на гости. Реал Мадрид исто така ќе има многу тешка задача дома, оти ги пречекува Манчестер сити, Јувентус, Олимпик Марсеј и Монако, додека на гости ќе се соочи со Ливерпул, Бенфика, Олимпијакос и дебитантот Каират. Во текот на првата фаза, секако дека ќе можат да се видат многу интересни дуели, односно големи дербија, како што се на пример: Баерн Минхен – Челси, Арсенал – Баерн Минхен, Челзи – Барселона, Наполи – Челзи, Интер – Ливерпул, Интер – Арсенал, Борусија Дортмунд – Интер, Атлетико Мадрид – Интер, Ливерпул – Атлетико Мадрид, Арсенал – Атлетико Мадрид и други.
Тоа е епилогот од ждрепката за лигашката фаза во новата сезона во Лигата на шампионите, која се одржа во Монте Карло. Вкупно 36 екипи беа поделени во четири барабани, секој со по девет клуба. Секој клуб ќе игра осум натпревари, по четири дома и на гости, и доби по два ривала од секој од четирите барабани. Според пропозициите, клубовите од иста земја не можат да играат во лигашкиот дел во ЛШ, а ниту еден тим не може да има повеќе од два ривала од иста држава. Групната фаза на ЛШ ќе трае од 16 септември годинава до 28 јануари 2026 година. Осумте првопласирани екипи ќе обезбедат директно место во осминафиналето, додека клубовите од 9-то до 24-то место ќе играат плејоф за да им се придружат. Екипите што на крајот од лигашката фаза ќе бидат пласирани од 25-то до 36-то место, ќе ја завршат сезоната во најелитното фудбалско натпреварување. Распоредот по кола, термините и саатниците ќе бидат познати денеска. Г.И.
Нов термин на финалниот дуел
УЕФА објави дека почнувајќи од 2026 година, финалето во Лигата на шампионите ќе започне во нов временски термин. Наместо како досега во 21 часот, натпреварот ќе стартува во 18 часот по средноевропско време. Првиот натпревар што ќе се игра вака, ќе биде финалниот дуел во Будимпешта. Според Европската куќа на фудбалот (УЕФА), одлуката е донесена со цел да се подобри искуството на навивачите, тимовите и градовите-домаќини. Ваквиот термин ќе овозможи полесен пристап до јавниот превоз по мечот, побезбедно и полесно патување за навивачите, но и поголем економски ефект за домаќинот оти славењето ќе може да продолжи подолго по мечот. Исто така на овој начин ќе се создаде многу пријатна атмосфера за семејствата и децата, а ќе има и поширок телевизиски дострел, особено кон помладата фудбалска публика.
Посебно признание за Челси
На чинот на ждрепката во ЛШ, УЕФА посебно признание му додели на Челси, првата екипа што триумфираше во сите натпреварувања во организација на УЕФА. Клубот од Лондон може да се пофали со трофеи во своите витрини од Лигата на шампионите, Купот на УЕФА, Лига Европа, Купот на победниците на куповите, Суперкупот на УЕФА и Конференциската лига. Челси двапати беше европски шампиони (2012, 2021), има ист број титули и во Лига Европа (2013, 2019), два пехара во Купот на победници на куповите (1971, 1998), како и двоен триумф во Суперкупот на Европа (1998, 2021).
