Црвено-жолтите, кои се во серија од девет официјални меча без пораз, продолжија со собирањето бодови, па априлските 6,62 се дополнија на бодовите освоени лани, и тоа 7,95 во ноември, 9,83 во октомври и 2,55 во септември. Македонија е на 67-то место, а од ривалите во квалификациската група за пласман на СП 2026, Белгија е на осмото место, Велс е на 29-то, Казахстан е на 113-то, а Лихтенштајн е на 205-то
ФУДБАЛ
Македонија остана на 67-то место на априлската ранг-листа на Светската фудбалска федерација (ФИФА), со новите вкупно 6,62 бода освоени во двата меча во март (победа на натпреварот со Лихтенштајн на гости и реми со Велс дома), во квалификациите за пласман на Светското првенство (СП) в година во САД, Мексико и во Канада.
Црвено-жолтите, кои се во серија од девет официјални меча без пораз (седум победи, две ремија во дуели од квалификации за СП или за Европско првенство, како и во Лигата на нации) продолжија и со низата со собирање бодови за листата на ФИФА, па априлските 6,62 бода се дополнија на бодовите освоени во минатата година, и тоа 7,95 за листата во ноември, 9,83 во октомври и 2,55 за рангирањето во септември (во декември најголемиот број селекции не освоија бодови, поради малиот број меѓународни натпревари во тој период) и од 1.348,63 поени во јули лани, сега има 1.375,58, што е втор најдобар резултат откако Светската фудбалска федерација од 2018 година применува нов бодовен систем.
Од ривалите на Македонија во квалификациската група за пласман на Светското првенство во 2026 година, Белгија е на осмото место, Велс е на 29-то, Казахстан е на 113-то, а Лихтенштајн е на 205-то место.
Актуелниот светски шампион Аргентина го зголеми водството на врвот на рангирањето на ФИФА. Избраниците на селекторот Лионел Скалони станаа првите од Јужна Америка што се пласираа на Мундијалот в година, со победите во март на дуелите со Уругвај и со Бразил. Две од другите три селекции што обезбедија пласман на Светското првенство за време на мартовските мечеви, Јапонија и Иран, ги задржаа своите места, 15-то, односно 18-то место, а Нов Зеланд се искачи за три позиции и сега е 86-ти, пишува Светската фудбалска федерација.
Имаше одредени поместувања меѓу првопласираните 10 селекции на листата на Светската фудбалска федерација за април, па, така, местата си ги сменија репрезентациите на Шпанија и на Франција (Шпанија сега е втора, Франција е трета), како и селекциите на Холандија и на Португалија (Холандија е шеста, Португалија е седма).
Од домаќините на Светското првенство, репрезентацијата на САД остана на 16-то место, Мексико се искачи за две места до 17-та позиција, а Канада ја достигна својата најдобра позиција досега на ранг-листата на ФИФА, откако се искачи за едно место и е 30-та, пишува Светската фудбалска федерација. Вкупно се рангирани 210 репрезентации од целиот свет. Н.М.
РАНГ-ЛИСТА НА ФИФА ЗА АПРИЛ
1. Аргентина 1.886,16
2. Шпанија 1.854,64
3. Франција 1.852,71
4. Англија 1.819,20
5. Бразил 1.776,03
6. Холандија 1.752,44
7. Португалија 1.750,08
8. Белгија 1.735,75
9. Италија 1.718,31
10. Германија 1.716,98
——————————————————-—————
29. Велс 1.535,57
67. Македонија 1.375,58
113. Казахстан 1.177,66
205. Лихтенштајн 813,86
