Холивудските ѕвезди Рејнолдс и Мекелхени сега се далеку од тоа да бидат единствени познати лица на сцената, по искачувањето на Рексам низ лигите до дивизијата Чемпионшип, од 2020 година
Додека Рајан Рејнолдс, заедно со колегата филмска ѕвезда, инвеститор Роб Мекелхени, уживаше во искачувањето на Рексам низ лигите до дивизијата Чемпионшип, по преземањето во 2020 година, Питер Меккормак храбро си постави цел да го стори истото тоа во Реал Бедфорд, низок полупрофесионален клуб што го стекна две години подоцна. За да ја помогне својата кауза, локалецот на Бедфорд, Меккормак, лани обезбеди инвестиција од 3,6 милиони фунти, најголемата во нелигашкиот фудбал, од Камерон и Тајлер Винклвос, основачи на претходник на Фејсбук, а сега милијардери со криптовалути, пишува „Би-би-си“.
Меккормак е на чело на новиот бран на англиски нелигашки фудбал. Долго сметан за немоден свет на несредени терени и запуштени клубови, неодамнешното доаѓање и раширениот успех на холивудските ѕвезди во Рексам внесе парче гламур во досега занемарениот пејзаж. Брзо се прошири низ целата земја. Порано единствен интерес на локални бизнисмени и, поретко, на бизнисменки, растечки број клубови сега имаат корист од тежината и од значителните парични средства од познати личности, претприемачи желни за публицитет, гуруа на социјалните медиуми и странски инвеститори привлечени од долните нивоа на фудбалската пирамида на Англија, која опфаќа сѐ под целосно професионалната Лига два.
Просечната неделна посетеност во првите четири нелигашки нивоа достигна рекорден максимум од 117.586 минатата сезона, што е зголемување од 43 отсто во последните пет години и 89 проценти за една деценија.
Рејнолдс и Мекелхени сега се далеку од тоа да бидат единствени познати лица на сцената. Кога повеќекратно наградуваниот рапер Стормзи и поранешниот фудбалер на Кристал Палас, Вилфред Заха, го купија деветтолигашкиот клуб Кројдон Атлетик во 2023 година, нивните мотивации го поттикнаа лондонскиот кварт во кој двајцата пораснаа. Клубот веднаш доби промоција во првата сезона. Неколку стотици километри на север, членот на машкиот бенд „Вестлајф“, Брајан Мекфаден, раскажа за аспирациите да го следи патот на Рејнолдс кога тој и пејачите на „Бојзон“, Шејн Линч и Кит Дафи, станаа неофицијални јавни лица на клубот од Северната лига, Чорли, минатата година. На други места, посетеноста на Чешам јунајтед од Јужната лига речиси се дуплира во двете години откако телевизискиот хит „Таскмастер“ стана спонзор на дресовите на клубот, благодарение на неодамна назначениот директор на клубот и креаторот на шоуто, Алекс Хорн. Слично на тоа, актерката од „Лајн оф дјути“, Вики Меклур, и нејзиниот сопруг Џони Овен го спонзорираа дресот на тогашниот седмолигашки Мертир таун преку нивната продуцентска компанија три сезони, од 2021 до 2022 година. Посетеноста на клубот речиси се зголеми тројно оттогаш и минатата сезона стана шампион на Јужната лига премиер саут. Поп-ѕвездата на „Литл микс“, Џејд Тирлвол, стана почесна претседателка и акционерка на нејзиниот локален клуб што не е во лигата, Саут шилдс, во 2020 година, пред да го стави шалот на Маринерс во дебитантското соло-музичко видео. Клубот првпат стигна до шестата лига во сезоната 2023/2024.
Социјалните медиуми одиграа значајна улога во порастот на популарноста. Кога група тинејџерски пријатели го купија Волтон и Хершам од 10-та лига пред шест години, тие се претставија како „најмладите сопственици на фудбалски клуб во светот“ и брзо заработија повеќе од еден милион следбеници на Тикток. Оттогаш тие беа промовирани трипати и отворија сестринската академија на клубот во Флорида.
– Бројот на луѓе што го следат нелигашкиот фудбал денес во споредба со пред пет години е како ноќ и ден. Тој фудбал од перспектива на брендот, навистина е на исто ниво со клубовите од Лига 1 и Чемпионшип. Единствената разлика е фудбалскиот производ. Играта е гламуризирана на позитивен начин – вели сопственикот Сартеј Такер, пренесе „Би-би-си“.
Откако ја продаде својата глобална агенција за маркетинг за повеќе милиони, Хари Хуго бараше нелигашки клубови во радиус од 25 км од неговата куќа и го купи Фарнам таун во 2022 година. Тие соработуваа со разни креатори на онлајн содржини и имаа два последователни триумфа за титулата за да стигнат до Јужната лига премиер дивизија југ.
– На почетокот бевме многу скептични. Но сега би рекол дека сме најжешкиот билет во градот. Ова е најдоброто хоби во светот – се сеќава тој за својот потфат во нелигашкиот фудбал.
Елиот Страуд води интернет-страница за луѓе што сакаат да инвестираат во фудбалски клубови. Во рок од една година од лансирањето на неговата компанија во 2023 година, тој создаде посебен портал исклучиво за нелигашки клубови, кои сега одземаат 70 отсто од неговото време. Причината, вели тој, се Рејнолдс, Меклхени и нивното ТВ-шоу „Добре дојдовте во Рексам“.
– Луѓето често велат дека сакаат да „направат Рексам“, што стана вообичаен термин. Дефинитивно имаше влијание. Неверојатно е со колку потенцијални инвеститори разговарам, а кои само сакаат да зборуваат за шоуто, колку е реално да се направи она што го направиле тие и колку пари ќе бидат потребни. Тоа многу, многу често се појавува во разговорот – вели Страуд.
Во Реал Бедфорд, амбицијата на Меккормак да го однесе клубот од 10-то ниво во Премиер-лигата почна со три титули во низа. Ако продолжи со ова темпо, неговиот тим еден ден може да се сретне со Рексам во горните нивоа на англискиот фудбал.
– Нашиот клуб е незапирлив во она што сакаме да го направиме. Фудбалските поместувања се одлични. Придобивката од тоа е проширувањето на самиот фудбал. Тоа е нова енергија. Рексам, како град, беше трансформиран од Рајан Рејнолдс и ми се допаѓа тоа. Се надевам дека ќе го трансформираме Бедфорд. Работата со Рексам беше одлична за сите – рече тој, пренесе „Би-би-си“. Н.М.
