ФУДБАЛ
Светската фудбалска федерација (ФИФА) го објави воведувањето на „Наградата за мир на ФИФА – Фудбалот го обединува светот“ за да ги награди поединците што презеле исклучителни и извонредни акции за мир и со тоа ги обединиле луѓето низ целиот свет, пишува ФИФА. „Наградата за мир“ ќе се доделува во име на сите луѓе што го сакаат фудбалот од целиот свет. Со своите секојдневни акции во и за фудбалот, сите овие луѓе придонесуваат кон мотото на ФИФА, „Фудбалот го обединува светот“, бидејќи ги обединуваат девојчињата и момчињата, жените и мажите околу страста, радоста, надежта и среќата и затоа е сосема соодветно посебна награда да признае посебно достигнување, пишува ФИФА.
Наградата ќе им биде доделена на поединци што преку нивната непоколеблива посветеност и нивните посебни акции помогнале да се обединат луѓето низ целиот свет во мир и затоа заслужуваат посебно и уникатно признание. Наградата ќе се доделува секоја година, а првата ќе ја додели претседателот на ФИФА, Џани Инфантино, на 5 декември годинава, кога ќе биде влечена ждрепката за Светското првенство во 2026 година, во Вашингтон.
– Во еден сѐ понемирен и поделен свет, фундаментално е да се препознае извонредниот придонес на оние што работат напорно за да ги прекинат конфликтите и да ги зближат луѓето во духот на мирот. Фудбалот се залага за мир и, во име на целата глобална фудбалска заедница, „Наградата за мир на ФИФА – Фудбалот го обединува светот“ ќе ги препознае огромните напори на оние поединци што ги обединуваат луѓето, носејќи надеж за идните генерации – рече Инфантино, пренесе ФИФА. Н.М.
