Освојувањето на Ла лига, разговор што моментално е забранет од самиот клуб, ќе биде класифицирано како една од најголемите фудбалски приказни, поголема и од таа на Лестер. Но, како еден клуб, со посетеност од само 200 гледачи во почетокот на векот, се најде во трка за висок пласман, пишува „Би-би-си“
ФУДБАЛ
Џирона, предводена од тренерот Мигел Анхел Санчез Муњоз, познат како Мичел, по половина од сезоната водеше во фудбалското првенство на Шпанија, пред Реал Мадрид, постигна повеќе голови од кој било друг тим (46) и претрпе само еден пораз, со 0-3, дома, од тимот на Карло Анчелоти. Освојувањето на Ла лига, разговор што моментно е забранет од самиот клуб, ќе биде класифицирано како една од најголемите фудбалски приказни, поголема и од таа на Лестер во англиската Премиер-лига во 2016 година, пишува „Би-би-си“.
Но како еден клуб, со посетеност од само 200 гледачи во почетокот на векот, се најде во трката за висок пласман? Основана пред 93 години, Џирона дури во 2008 година влезе во Втората лига. Историски гледано, повеќето фудбалски навивачи во градот ја поддржувале Барселона или, пак, Еспањол. И покрај тоа што игра на најмалиот стадион во моментот во Ла лига, во 1999 година, „Естади Монтилви“ со капацитет за 15.000 луѓе мораше да изгледа како пештера со околу 200 гледачи што ја гледаат нивната екипа како игра во петтото ниво на шпанскиот фудбал. Работите почнаа да се менуваат кога тимот конечно се искачи во второто ниво на Шпанија во 2008 година, по две промоции по ред. Тие влегоа во Првата лига првпат во нивната дотогашна 87-годишна историја, откако беа втори на табелата на крајот од сезоната 2016/2017. Пристигнувањето на Гвардиола, не Пеп, туку на неговиот помлад брат Пере, на крајот од сезоната 2014/2015, ги револуционизира работите во клубот, пишува „Би-би-си“.
Пере пристигна во клубот со искуство во фудбалски маркетинг и развој со компании. Пред 15 години тој кооснова агенција и стана еден од највлијателните агенти во фудбалот со листа на клиенти, вклучувајќи ги и неговиот брат Андрес Иниеста и Луис Суарез, пишува „Би-би-си“. И покрај испаѓањето неколку сезони подоцна, Џирона се врати во Првата лига во 2022 година, победувајќи во плејофот, по две сезони порази токму во плејофот. Нивното враќање беше организирано од тренерот Мичел, кој му се приклучи на клубот во почетокот на сезоната 2021/2022. Мичел претходно работеше во Рајо Ваљекано и во Хуеска, и двата претходно ги водеше во Првата лига. Еден од клучевите за првата сезона на Мичел во клубот беше тоа што сопствениците ја задржаа довербата во него кога тимот се најде на погрешниот крај на табелата. Тие беа промовирани, а потоа беа на 10-то место во нивната прва сезона назад во елитата, и покрај заминувањето на клучни играчи.
ЕВЕНТУАЛЕН НАСЛЕДНИК НА ЧАВИ ВО БАРСЕЛОНА?
Мичел има малку Пеп Гвардиола во него, иако тој е далеку од тоа да биде фудбалски иноватор или визионер, пишува „Би-би-си“. Иако е сигурно интензивен, 48-годишниот тренер има јасна идеја за тоа што сака и како да го постигне тоа на теренот и има способност да ги подобри играчите и да ја промени тактиката на својот тим на средината на натпреварот. Основниот пристап на Мичел се заснова на посед на топката кога е потребно, но и директност и контранапади, мешавина не многу различна од онаа на Манчестер сити, пишува „Би-би-си“. Тој исто така знае како да ги насочува своите играчи, што е нешто што ретко кој менаџер може успешно да го направи и има будно око за помалите детали.
И покрај тоа што има редовен контакт со Пеп Гвардиола, тој цени каде е сега и од каде дошол. Така, додека другите прават споредби со монументалното достигнување на Лестер со освојување на титулата, засега Мичел не зема ништо здраво за готово освен можеби задоволството од знаењето дека 49-те бода што неговата екипа ги има собрано до минатото коло ќе гарантираат опстанок. И, да, можеби во соблекувалните се дискутира за можноста да се стигне до Европа.
Неговите родители водеа продавница за овошје во работничката област Ваљекас во Мадрид и бидејќи мораа да работат до 12 часа на ден за да стават храна на масата, Мичел и неговите тројца браќа беа воспитани од нивните баба и дедо. Ваљекас беше неговиот дом и тој стана херој во Рајо Ваљекано, каде што забележа 425 настапи, пред да стане нивни тренер во 2017 година. Не остана незабележано ниту вниманието на Мичел кон деталите и начинот на адаптација. Приказните дека тој е на работ да ја напушти Џирона и да најде поголем дом се далеку од целта. Претседателот на Џирона, Пере Гвардиола, е реален за иднината на својот тренер.
– Може да си замине кога сака, тоа го заработи. Ако добие понуда од Баерн и има договор со Џирона, јас сам би го однел со автомобил во Минхен. Тоа што го направи во Џирона е нешто за што треба вечно да му се заблагодарува – изјави неодамна Гвардиола.
КОЛКУ Е ВАЖНА ВРСКАТА НА ЏИРОНА СО ГРУПАТА МАНЧЕСТЕР СИТИ?
На 23 август 2017 година, Сити фудбал груп купи 44,3 отсто од сопственоста во Џирона, а други 44,3 проценти има фудбалската група Џирона, предводена од Пере Гвардиола. Набрзо по пристигнувањето во клубот, Пере Гвардиола се зафати да обезбеди договори за позајмување играчи на Сити или талентирани млади на кои им требаа минути за да се развијат во ѕвезди од светска класа, нешто што беше главен извор на ѕвезди на Џирона низ годините. Во сезоната 2015/2016 четворица играчи беа позајмени од Манчестер сити во Џирона, тројца во 2016/2017, петмина во 2017/2018, во следната сезона имаше тројца, во 2020/2021 четворица, потоа три лани, вклучувајќи и еден од друг клуб во сопственост на Сити фудбал груп, Њујорк сити, пишува „Би-би-си“.
Сојузот на неколку клуба низ светот овозможува поедноставна размена на фудбалери меѓу тимовите. Сепак, тоа е далеку од тоа да биде главната причина за успехот на клубот, што се должи главно на некои екстремно итри зделки на пазарот за трансфери и позајмувања и покрај сериозните финансиски ограничувања, пишува „Би-би-си“. Објавените бројки го илустрираат огромниот јаз меѓу гигантите во Ла лига и клубовите како Џирона во сите аспекти на клубот, вклучувајќи ги и платите за сите.
Клучен за планот беше спортскиот директор Кике Карсел, чија остроумност на пазарот му помогна на Мичел да ги изгради темелите што донесоа успех. Неговата способност да забележува таленти и да гради тимови за секој менаџер навистина се истакна, како и неговата вештина постојано да ја обновува екипата секоја сезона за да ги покрие заминувањата. Имаше потпишувања, како и голем број договори за позајмување, иако ништо слично на купувањето со големи пари на европските елитни клубови, пишува „Би-би-си“.
МОЖЕ ЛИ ЏИРОНА ДА ГО ИЗНЕНАДИ ФУДБАЛСКИОТ СВЕТ И ДА ГО ПОВТОРИ ПОДВИГОТ НА ЛЕСТЕР?
Додека освојувањето на титулата на Лестер беше огромна работа, сличен триумф за Џирона би го надминал тоа. Додека сите уживаат во овој успех, секој разговор за освојување на титулата е забранет во клубот. Меѓутоа, она што го покажа е дека не е сѐ до парите и до ѕвездите, а фудбалскиот успех и здравото управување и внимателното домаќинство не се исклучуваат меѓусебно, пишува „Би-би-си“. И додека никој не зборува за освојување на титулата, вреди да се напомене дека во историјата на Ла лига ниту еден клуб со толкав број бодови во оваа фаза од сезоната не успеал да не се пласира во Лигата на шампионите (ЛШ), а тоа навистина би било успешна приказна, пишува „Би-би-си“. Н.М.
