Фото: ЕПА

Тие веќе не можат да бидат послабо пласирани од последното место што во првенствата на Германија, односно на Франција, носи пласман во најсилното европско клупско фудбалско натпреварување. Тоа може да го сторат уште неколку клуба веќе викендов. Според актуелниот пласман на табелите во петте најсилни првенства во Европа, на пример, можни се измени во однос на клубовите што играа сезонава во Лигата на шампионите

ФУДБАЛ

Баерн и Пари сен Жермен први го обезбедија пласманот во Лигата на шампионите за следната сезона, откако на седум кола до крајот на сезоната веќе не можат да бидат послабо пласирани од последното место што во првенствата на Германија, односно на Франција, носи пласман во најсилното европско клупско фудбалско натпреварување. Тоа може да го сторат уште неколку клуба веќе викендов.
Сезонава во многу домашни фудбалски првенства се останати уште седум-осум кола, а според пласманот на табелите во петте најсилни шампионати во Европа (Англија, Шпанија, Франција, Германија и Италија), на пример, можни се измени во однос на клубовите што играа сезонава во лигашкиот дел на Лигата на шампионите.
Така, на места на табелите во домашните првенства што носат пласман во Лигата на шампионите се повеќе тимови што сезонава не играа во најсилното европско клупско натпреварување, како, на пример, Ајнтрахт и Мајнц во Германија, Нотингем форест и Челси во Англија, Наполи во Италија, Атлетик Билбао во Шпанија и Марсеј во Франција. Од нив, Ајнтрахт и Атлетик сезонава играа во Лига Европа, а Челси во Конференциската лига и сите ќе настапат идната недела во четврт-финалињата.
Во Европа неколку првенства се веќе одиграни и повеќе клубови обезбедија влез во квалификациите, како на пример норвешките Бодо Глимт, кој ќе игра во плејофот (сезонава е во четврт-финалето на Лига Европа), и Бран, кој ќе настапи во второто квалификациско коло, како и повеќе од дузина клубови од други земји што ќе играат во првото коло од квалификациите за влез во Лигата на шампионите.
И идната сезона ќе се игра според форматот што дебитира сезонава, па ќе настапат по 36 тима во секој од трите европски купа. Покрај стандардните места од секоја лига што носат пласман во Лигата на шампионите, Европската фудбалска унија (УЕФА) и сезонава ќе додели две дополнителни места, по едно за двете земји со најдобар вкупен ефект на нејзините тимови во сите три европски купа сезонава, Лигата на шампионите, Лига Европа и Конференциската лига.
Во моментов во водство на таа табела на Европската фудбалска унија се Англија и Шпанија, од кои, ако останат на тие места, во Лигата на шампионите ќе настапат и петтопласираните во соодветните домашни првенства. Според ефектот лани тие места за сезонава ги освоија Италија (Болоња) и Германија (Борусија Дортмунд). Н.М.