По титулата во Бундеслигата доаѓаат планови за развој на академијата, кои би можеле да го направат одржлив нивниот извонреден успех, пишува „Скај спорт“
Што останува да постигне Баер? По поставувањето на тоа прашање до спортскиот директор Симон Ролфес на неодамнешната посета на шампионот во Бундеслигата, неговиот одговор е изненадувачки, тој не зборува за поголема слава, туку за развој на академијата, пишува „Скај спорт“.
– Во моментов имаме само двајца играчи во нашиот тим од академијата – вели Ролфес за „Скај спорт“.
Еден од нив е Флоријан Вирц, кој помина голем дел од својот развој во Келн, а другиот е резервниот голман Никлас Ломб.
– Да го имаме истото ниво што го имаме сега, но со пет, шест, седум, осум или девет играчи од академијата, би било фантастично. Мислам дека тоа ќе му даде на овој клуб уште еден поттик во однос на развојот и нашиот идентитет. Тоа е долгорочен проект.
Правиме големи чекори во академијата со многу повеќе репрезентативци. Пред пет години имаше можеби двајца-тројца, сега се речиси 20. Се подобруваме, но мора да докажеме дека сме способни да ги развиваме нив. Сѐ уште е голем предизвик – рече Ролфес.
Зборувајќи со извршниот директор Фернандо Каро, тој го изрази истото чувство, нагласувајќи го фактот дека тоа е прашање од централно значење во размислувањата на Баер, бидејќи сака да го надгради триумфот за титулата, пишува „Скај спорт“.
– Една многу важна работа за нас е да ја зајакнеме нашата академија. Мораме да бидеме поуспешни во префрлањето на играчите од академијата во првиот тим. Но, секако, поради повисокото ниво на нашиот прв тим секогаш е сѐ потешко – вели Каро.
Човекот задолжен да ја испорача промената што ја бараат неговите шефови е Холанѓанецот Џефта Бресер, директор на академијата.
– Можам да се носам со притисокот. Ако не, јас не сум вистинскиот човек – изјави тој за „Скај спорт“.
Бресер, кој пристигна во Леверкузен во октомври, кога првиот тим веќе беше во својата неверојатна трка кон трофејот, укажува на истражување што покажува дека Германија произведува помалку од еден професионалец на еден милион жители, пишува „Скај спорт“. Во Португалија и Холандија се речиси пет.
– Англија е помеѓу два или три на еден милион. Статистиката може да значи само две работи. Или во Германија нема таленти или не ги развиваме како што треба. И мислам дека мора да биде второто, бидејќи фудбалот е и спорт број еден во Германија. Развивањето тренери помага да се развијат играчите. Сѐ почнува со квалитетно тренирање – вели тој.
ИНДИВИДУАЛНО ВНИМАНИЕ
Бресер беше технички тренер во Фулам под водство на Мартин Јол, а потоа и под Андре Вилаш-Боаш и Лучијано Спалети во Зенит. Тој никогаш не ја изгубил од вид важноста на работата „еден на еден“ во помагањето да се развијат играчите.
– Луѓето забораваат колку е важно ова индивидуално внимание, дури и на првотимско ниво. Не секогаш се работи за специфични вежби. Се работи за внимание од тренерот. Тоа носи самодоверба, што носи добро чувство и што придонесува за перформансите – рече тој.
Друга значајна планирана промена е драматично зголемување на бројот на играчи од академијата.
– Ги гледам моделите на Бенфика и на ПСВ. Би сакал да донесам повеќе деца во академијата на помлада возраст за да има поголема основа, поширока пирамида – рече Бресер.
Амбицијата на Бресер е да има двојни тимови за секоја возрасна група. Не со цел да ослободат повеќе од нив, туку наместо тоа, да се понудат поголеми гаранции.
– Не сакам прерано да ги отселектирам играчите. Од сезонава тимот за момчиња до 11 години добива ветување дека ќе можат да останат со нас од петто до десетто одделение во училиште. Значи, тие не се само во нашите училишта многу години туку и во нашата фудбалска академија. Мислам дека тоа е моќна работа. И тоа е она што ќе го направиме – рече тој.
Тој, исто така, се надева дека тоа ги охрабрува тренерите да се фокусираат на индивидуалниот развој наместо на тимскиот успех.
– Тренерите треба да се чувствуваат удобно и да не го чувствуваат притисокот од победите. Понекогаш ќе загубиме натпревари. Тоа воопшто не е проблем. Нашиот индивидуален пристап во комбинација со фактот дека подолго се посветуваме на развојот на децата може да биде разликата за нас, похолистички пристап. Не можеме да размислуваме секогаш да го најдеме тој подобар млад играч од соседството. Секогаш има простор да се донесат нови деца. Но тие треба да бидат меѓу најдобрите пет – вели Бресер.
Бресер сака прво да ја направи основата како што треба, но последниот чекор од дипломиран во академија до првотимски фудбал останува најголемиот скок. Каро истражува опции, без разлика дали тоа е стратегиски однос со клуб во Белгија, Холандија, Австрија или на друго место.
– Ние го немаме она што го имаат другите клубови, можеби го имаат конкурентите со повеќе клубови, каде што има втор тим. Ова е нешто што треба да го разгледаме. Во моментов го анализираме и ќе треба да разговараме за стратегијата – рече Каро.
Бресер: Сакам Европа да зборува за нашата академија
Бресер вели дека скокот од академија во Лигата на шампионите е „премногу голем“ за повеќето млади играчи.
– Во фудбалот тежнееме да се фокусираме на исклучоците. Флоријан Вирц беше подготвен на 17 години, но тој е исклучок. Повеќето од момчињата се подготвени кога имаат 21 или 22 години. Мора да има некои решенија. Како што споменавме, дали ни треба втор тим? Дали ни требаат партнерски клубови или клубови помошници? Имаме многу талентирана група родени во 2007 година. Тоа значи дека за една година ни треба решението за следните чекори за овие момчиња – рече Бресер.
Но пораката од клубот од Леверкузен, кој сака целосно нов тренинг-центар пред крајот на деценијата, е дека трае потрагата за тие решенија. Да се најде начин да се одржи тој успех е следниот предизвик и академијата е начин да се направи тоа.
– Можеби тоа е сон, но јас апсолутно сакам Баер да биде меѓу трите најдобри академии во Германија. Сакам Европа да зборува за нашата академија. Тешко да се замисли? Така беше и за титулата во Бундеслигата. Во Леверкузен соништата можат да се остварат – вели Бресер.
