ФУДБАЛ
Ако доаѓате од Европа мислејќи дека знаете сѐ што треба да знаете за фудбалот и сѐ што можете да направите тука е фантастично или неверојатно, сосема грешите. Веќе не е лесно да додадете нешто што го прави овој клуб подобар. Нивото тука е многу високо. Ви велам, ќе гледате сѐ повеќе и повеќе еквадорски играчи од Индепендиенте дел Вале во најголемите клубови во Европа. Многу скаути се тука од секаде. Сите сакаат да дојдат. Сите сакаат да откријат кој е следен, вели Хавиер Рабанал, шпанскиот тренер на вториот тим на Индепендиенте
Летово Борусија Дортмунд се договори за потпис на еквадорскиот тинејџер Џастин Лерма, кој нема да му се приклучи на германскиот фудбалски клуб додека не наполни 18 години, а до тоа остануваат речиси две години. Добре дојдовте на изворот на таленти на Индепендиенте дел Вале, пишува „Скај спорт“. Кендри Паез, кој уште има само 17 години, треба да пристигне во Челси следното лето, а тој трансфер беше договорен пред повеќе од една година. И Борусија Дортмунд и Челси се убедени дека ќе имаат фудбалска суперѕвезда од следната генерација. Довербата доаѓа од брзиот успех на Моисес Каиседо откако му се приклучи на Брајтон од Индепендиенте во 2021 година. Друг од таа академија, Пјеро Хинкапи, сега е шампион во Бундеслигата со Баер Леверкузен, Вилијан Пачо штотуку му се приклучи на Пари сен Жермен…, пишува „Скај спорт“.
– Ако доаѓате од Европа мислејќи дека знаете сѐ што треба да знаете за фудбалот и сѐ што можете да направите тука е фантастично или неверојатно, сосема грешите. Веќе не е лесно да додадете нешто што го прави овој клуб подобар. Нивото тука е многу високо – изјави за „Скај спорт“ Хавиер Рабанал, шпанскиот тренер на вториот тим на Индепендиенте.
РАЗВОЈ НА МЛАДИТЕ НАМЕСТО КРАТКОРОЧНИ РЕЗУЛТАТИ
Не толку одамна, Индепендиенте, со седиште во Салголки, мал град на периферијата на Кито, не беше ниту голема вест во Еквадор. Но претприемачот Мичел Делер имаше визија за тоа како тогашната екипа од трето ниво со малку обожаватели може да најде предност пред нивните славни ривали, пишува „Скај спорт“. Пари беа вложени за ангажирање играчи, акцентот беше ставен на развојот на младите наместо на краткорочните резултати на теренот. И покрај тоа, не можеше да има гаранција дека ќе се најде злато, ниту сигурност дека суровините биле таму и само чекале да се најдат. Но играчи беа пронајдени и направени. До 2016 година, Индепендиенте стигна до финалето на Копа либертадорес, победувајќи ги Ривер плата и Бока јуниорс на патот дотаму, и оттогаш двапати го освои Копа судамерикана, вториот престижен трофеј во Јужна Америка. Успехот на сениорско ниво е поткрепен од најдобрите млади играчи на континентот. Нема поуспешна екипа до 20 години во младинската Копа либертадорес, бидејќи Индепендиенте стигна до финалето на четири од претходните пет турнири.
– Скаутингот е неверојатен. Овие играчи се навистина талентирани. Тие имаат сѐ што е потребно, технички и тактички. Скаутираме навистина, навистина брзи и силни играчи – вели Рабанал.
Тоа е средина за учење.
– Тие поставуваат прашања како да го направат ова, како да го направат она, но почетното ниво беше навистина високо. На исто ниво на клубови што ги познавав во Европа и подобри од многу – вели тој.
ТАЛЕНТОТ НЕ Е ДОВОЛЕН
Има редок фокус на едукација на 150 момчиња и девојчиња што студираат во академијата.
– Имаме сопствено училиште во објектот и програмата за нив е различна од онаа во остатокот од земјата. Се грижиме тие да имаат нешто за нивната иднина, нешто во нивниот мозок повеќе од само фудбал. Тие мора да зборуваат англиски. Не е доволно да се биде талентиран. Сакаме да се приспособат на реалноста во Европа – вели Рабанал.
Тој постојано ги потсетува своите играчи што е потребно за да успеат.
– Се обидувам да бидам искрен со нив, објаснувајќи ја работната етика што е потребна. Тие се учат како да користат технологија, да се справуваат со пари, модерни вештини што се потребни. Станува збор за развој на човек, како и на играч. Тие треба да го направат чекорот на само 15, 16 или 17 години. Талентот не е доволен – рече Рабанал.
Талентите имаат тенденција да го заобиколат вториот тим на Рабанал.
– Мојата група е за оние што подоцна ќе ја направат својата експлозија – вели тој.
Но Индепендиенте има план и за нив. Нумансија во Шпанија и Пакос де Фереира во Португалија сега се дел од групата Индепендиенте. Емерсон Пата му се приклучи на португалскиот тим летово, вториот од тимот на Рабанал што го направи овој потег, заедно со двајца што заминаа во Нумансија и уште еден во сестринскиот клуб Атлетико Хуила во Колумбија.
– Јасно се гледа дека парите се инвестираат назад во клубот. Од јануари додадовме еден дополнителен терен, еден дополнителен стадион, една нова зграда за канцеларии, за членовите на одборот, за маркетинг-секторот, станбена зграда за играчите. Тоа веќе беше неверојатен објект порано, така што инвестицијата е огромна – вели Рабанал.
РЕЗУЛТАТИТЕ СЕ ЈАСНИ
Кога станува збор за стилот на игра, тој вели: „Сакаме посед со цел. Висок интензитет. Да ја чуваме топката и потоа да ја освоиме што е можно побрзо, притоа дозволувајќи креативност на играчите, особено крилните играчи. Сакаме тие да бидат динамични, да играат еден на еден, да ги покажат своите вештини“.
Резултатите се јасни. Индепендиенте, каде што талентот се среќава со напорна работа и со можности, напредува.
– Ви велам, ќе гледате сѐ повеќе и повеќе еквадорски играчи од Индепендиенте дел Вале во најголемите клубови во Европа. Многу скаути се тука од секаде. Сите сакаат да дојдат – вели тој.
И тие имаат една работа на ум.
– Сите сакаат да откријат кој е следен – рече Рабанал.
