Сè почесто наидуваме на препораки од нутриционисти да вклучиме авокадо во исхраната, обезмастено млеко, јогурт и посно сирење ако сакаме да ослабеме. Зошто ова овошје одеднаш е толку популарно и дали има поевтина алтернатива?
Авокадото има хранливи квалитети, содржи изобилство од витамини, минерали, мононезаситени масни киселини, некои корисни супстанции што ги нарекуваме антиоксиданти, влакна, но сите хранливи придобивки што ги обезбедува авокадото можат да се обезбедат и со балансирана исхрана што се состои од храна од нашето подрачје, со што би се испочитувале принципите на таканаречената медитеранска исхрана. Храната служи не само за задоволување на гладот туку и за обезбедување на функционирањето на телото, како во неговите основни потреби така и во ситуации на посебни потреби. Неправилната исхрана, без оглед на тоа дали е недоволна, прекумерна или неурамнотежена и со недостиг од важни состојки, претставува ризик по здравјето. До неодамна се сметаше дека животинските масти се штетни, се советуваше да се елиминираат црвеното месо и полномасните млечни производи, свинската маст. Сепак, индустриски произведената храна што содржи трансмасни киселини е уште поштетна од природните масти, на пример, хидрогенизираните растителни масти.
Добро би било да се примени препораката на Светската здравствена организација за вклучување и на омега-6 и на омега-3 масни киселини, така што тие да бидат во сооднос од 1:3 до 1:5. Ова значи дека треба да јадеме повеќе храна што содржи омега-3 масни киселини, што не е случај во нашите навики во исхраната. Еден корисен потсетник: извори на омега-3 незаситени масни киселини се рибата (туна, лосос), рибиното масло, ленено семе, оревите. Извори на омега-6 масни киселини се разни растителни масла, јајца, месо и месни производи.
