Ако сакате да имате убава, мазна и сјајна кожа, односно стаклена кожа, важно е да се грижите и за вашата исхрана. Тиктокерите се трудат најдобро што можат да постигнат таков ефект и даваат совети за примена на интересни препарати, а сега има и такви што ја нагласуваат важноста на исхраната, не само негата на кожата.
– Јас сум од Португалија, а нашите жени имаат вистинско тајно оружје за да имаат убава кожа – тоа се сардините – вели Катја, инфлуенсерка со дури 1,2 милион следбеници, која беше наречена кралица на сардините, бидејќи често ја препорачува оваа евтина храна и за одржување на здравјето и за негување на кожата однатре.
Нутриционистите објаснуваат дека сардините содржат изобилство од омега-3 масни киселини, витамин Д, Б12 и селен – сите хранливи материи што играат клучна улога во регенерацијата на кожата, намалувајќи ги воспалителните процеси и зачувувајќи ја еластичноста. Една порција сардини може да обезбеди 130 проценти од дневната потреба за витамин Б12 и речиси целото препорачано количество селен. Сардините се исто така богати со минерали како што се калциум, магнезиум и калиум, кои придонесуваат за обновување и рамнотежа на кожата. Благодарение на големите количества здрави масти и протеини, сардините ја поддржуваат цврстата структура на кожата и ја прават мазна и хидрирана. Дерматолозите истакнуваат дека убавата кожа не се постигнува само со кремови – правилната исхрана е основа на секој здрав тен.
Недостигот од есенцијални хранливи материи често се гледа токму на кожата, преку сувост, мозолчиња или губење на сјајот. Сепак, сардините сами по себе не се магично решение. Ако сакате вистински и трајни резултати, важно е да обрнете внимание на вашата целокупна исхрана. Ова значи дека треба да избегнувате шеќер, индустриски преработена храна, како и потенцијални алергени како што се глутен, млечни производи и јајца, кои кај некои луѓе можат да предизвикаат воспалителни реакции и да ги влошат состојбите на кожата.
