На сцената на театарот „Војдан Чернодрински“ во Прилеп, денеска, во 18 часот, премиерно ќе биде изведена претставата „Каменот“ од Маријус Фон Мајенбург, во режија на Кристина Димитрова. Тоа е хроника за семејството Хајзинг, која го опфаќа периодот од 1935 до 1993 година.
– Драмата раскажува дел од германската историја, задржувајќи се на овие шеесет години поминати во семејни тајни, лаги и измами, но и во чувство на вина и одговорност. Фон Мајенбург пишува за една честа појава: семејство бега од својата вина со избегнување, ревизија и поедноставување на минатото. „Каменот“ има фрагментарна структура – дејството буквално скока низ различни години: 1935, 1945, 1953, 1978 и 1993, а со тоа се создава необична и гротескна стварност, бидејќи гледачот сведочи за сомнежот во минатото и недоразбирањата во денешно време. Кога се открива вистината, дејството се враќа на самиот хронолошки почеток. Крајот нè остава без заклучок, но сознанието за разбирањето на семејството и неговото минато е засекогаш променето – вели Димитрова.
Во претставата играат: Наташа Ачански, Катерина Чакмакоска-Клинческа, Димитар Ѓорѓиевски, Јасмина Мицовска-Станкоска, Марија Димитрова и Илија Волчески. Сценографијата е на Валентин Светозарев, костимите на Розе Трајчевска-Ристовска, драматург е Лидија Митоска Ѓорѓиевска, а за музиката е задолжен Томе Темелкоски.
Ова е прва премиера на театарот „Војдан Чернодрински“ за време на пандемијата.
