И покрај тоа што француските галерии и малите музеи добија дозвола да почнат со отворање на 11 мај, еден од најжестоките јавни уметнички проекти во земјата е одложен поради пандемијата. Долгоочекуваното завиткување во ткаенина на Триумфалната порта во Париз е одложено за 2021 година. Проектот, во кој уметникот Кристо ја покрива портата во разнобојно платно, големо 269.097 квадратни метри, требаше да започне да се одвива во септември оваа година, но наместо тоа, ќе трае од 18 септември до 3 октомври 2021 година.
Долготрајниот проект беше замислен од Кристо и од неговата покојна сопруга Жин-Клод Дена де Гилебон во 1962 година. Парот е познат по обвиткување на монументални рачно изработени структури и пејзажи во ткаенина, вклучувајќи ги и парискиот мост „Понт Нуф“, берлинскиот Рајхстаг и водите што ги опколуваат островите во заливот Бискаин, Мајами.
Завитканата Триумфална порта првично требаше да се отвори во април за да се совпадне со изложбата во центарот „Помпиду“, посветена на работата на Кристо и на Жин-Клод. Но изложбата е одложена.
Додека изложбата на Кристо и јавната интервенција се одложени, европскиот уметнички свет започнува претпазливо повторно да се отвора на некои места.
Германските галерии ги отворија своите врати минатата недела, а музеите во Италија и во Белгија ќе започнат да ги примаат посетителите кон средината на мај. Повторното отворање е придружено со строги нови здравствени и безбедносни мерки, вклучувајќи и спроведување физичко растојание и строги планови за чистење.
