За новата ограничена колекција од десет предмети, „Икеа“ соработуваше со некои од најактуелните уметници на денешницата: мултидисциплинарниот американски уметник Даниел Аршам, јапонскиот колектив „Гелчоп“, групата „Хјуманс оф 1982“, холандската дизајнерка Сабина Марселис и Германецот Стефан Маркс
Од 2015 година, големата компанија за уредување на домот „Икеа“ негува соработка со уметници од целиот свет преку создавање уметнички колекции што ги слават современите уметнички изрази, со комбинација на различни медиуми и форми. Претходните колекции на „Икеа арт ивент“ вклучуваа предмети како рачно ткаени килими, фигурини од кристално стакло и украси за ѕидови во форма на фотографии, улична уметност и илустрации. Демократизацијата на уметностите, како нивна примарна цел, остана непроменета во текот на овие години, како одраз на уверувањето на „Икеа“ дека уметностите треба да бидат достапни за сите.
Со новото, шесто издание на колекцијата „Икеа арт ивент“, компанијата сака да ја донесе уметноста во домовите на што повеќе луѓе – овој пат замаглувајќи ја тенката граница помеѓу уметноста и дизајнот. За да тргне на ова патување, „Икеа“ покани уметници од различни профили од сите делови на светот: Даниел Аршам (Њујорк), „Гелчоп“ (Токио), групата „Хјуманс оф 1982 година“ (Стокхолм), Сабина Марселис (Ротердам) и Стефан Маркс (Берлин).
– Одлучивме да соработуваме со разни уметници од целиот свет за да покажеме дека различноста и убавината на уметноста и дизајнот одат најдобро заедно.
Оваа колекција докажува дека ако сте уметник или дизајнер, не мора да останете во рамките на само едно поле на работа, туку можете да работите во различни области. Ова ново движење има силно влијание врз денешниот дизајн и уметничка сцена – вели Хенрик Мост, креативен водач на колекцијата „Икеа арт ивент“.
Колекцијата се состои од десет предмети за украсување на домот што ја менуваат перцепцијата на работите што нè опкружуваат секојдневно, притоа внесувајќи поголема креативност во секојдневниот живот. Во колекцијата се ламбата на Сабине Марселис и ѕидниот часовник на Даниел Аршам, потоа столна ламба и украсна ламба, дизајнирана од Гелчоп, вазна дизајнирана од Стефан Маркс, како и необични украси на ѕидови, кои се дело на уметниците познати како „Хјуманс оф 1982“.
– Секој од овие производи има употребна вредност, а истовремено претставува и уметнички предмет. Традиционалното разбирање дека уметноста треба да биде само во музеј и дека решенијата за дизајн ѝ припаѓаат на масовната култура, едноставно е надминато – нагласува Хенрик Мост.
Демократизацијата на уметноста и можноста да ја имате дома никогаш не било поважно отколку во време кога нашиот пристап до галериите и изложбите е ограничен поради пандемијата.
Холандската дизајнерка од новозеландско потекло, Сабина Марселис, е фасцинирана од уникатните својства и ефекти што одредени материјали можат да ги создадат – на пример, интеракцијата на смола или стакло со дневна светлина. Таа се обидува да создаде магични искуства преку привлечни решенија за дизајн.
Даниел Аршам е мултидисциплинарен американски уметник, чии дела се базираат на комбинацијата на уметност, архитектура и перформанси. Во последниве години, тој наоѓа инспирација во предвидување на идните цивилизации и археолошкиот пад. Аршам е исто така коосновач на познатото студио за дизајн во „Њујорк снаркитектура“.
Групата „Хјуманс оф 1982“, чии основачи се Бастијан Бишоф и Пер Емануелсон, е создадена во 2009 година, за време на нивните студентски денови поминати на Универзитетот во Гетеборг. Колективот ги комбинира уметноста и дизајнот и отвора прашања во врска со брзиот развој на технологијата и нејзината дуалистичка природа како извор на напредок и истовремено причина за уништување на човечката природа.
Стефан Маркс е германски уметник и илустратор, кој ги толкува секојдневните искуства на свој креативен начин. Инспирацијата ја црпи од разни супкултури, како што се графити и техномузика, а во неговиот уметнички израз се потпира на разни медиуми. Во неговиот опус спаѓаат дизајнерски скејтборди, масла во голем формат, па дури и украсни порцелански вазни.
Јапонскиот колектив „Гелчоп“ е познат по деконструирање на секојдневни предмети, кои ги комбинира со разни елементи за да им даде нови димензии на функционалност на забавен, живописен и убедлив начин. Препознатливите дела на ова уметничко трио се производи што поттикнуваат пресврт во искуството на целесообразноста на предметите со кои сме опкружени.
