Вие ни пишувате
Во денешната рубрика „Вие ни пишувате“, ви ја претставуваме Лејла Шерифовска, која во основното училиште „Ѓорче Петров“ во истоимената скопска општина денеска завршува седмо одделение.
Таа е љубопитно девојче и, како што вели, ја пронаоѓа уметноста насекаде околу себе. Прочитајте што ни напиша таа во своето писмо до нашата Редакција:
„Здраво, се радувам што во денешниот број на ’Колибри‘, моите врсници од цела Македонија ќе можат да се запознаат со моите преокупации, а пред сѐ со фотографијата. Сакам да ловам убави случки, моменти што понекогаш траат само секунда, но преку фотографијата можат да останат засекогаш. Обожувам да фотографирам природа, животни, па дури и мали детали што другите можеби не ги забележуваат.
Имам и многу миленичиња – десет мачки, две кучиња, две водни желки и една риба. Сите тие ми се и инспирација и често ги цртам или ги фотографирам.
Освен фотографијата, мои хобија се цртањето и сликањето. Уживам кога со бои и линии можам да изразам како се чувствувам или што ми се врти низ мислите. Уметноста ми е начин да се изразам.
Сепак, во иднина, барем засега, сакам да станам модел или глумица, затоа што сакам сцена, камери и креативност. Сакам да влегувам во различни улоги и да ги пренесувам емоциите преку движења и изрази. Мислам дека уметноста е насекаде околу нас – и во сликата, и во зборот, и во движењето – и сакам да бидам дел од неа.
Ги поздравувам сите ученици и им посакувам убав и креативен летен распуст. Се разбира и јас ќе имам повеќе време да им се посветам на моите омилени активности“.
