Дали си во татковината или си некаде далеку по светот, дење или ноќе, секогаш си во дослух со чувствата и копнежот по родниот крај, татковината родна грутка. Во една моја песна запишав:
„Можеш да бидеш далечен
како Месечината
пак да го слушаш повикот
и ехото на татковината“
На еден таков чувствителен начин, преку копнежот и носталгијата, јас со
децении сум го слушал тој драматичен повик, кој прави нераскинлива врска меѓу откорнатикот и татковината. Затоа, во многу мои песни се чувствува носталгијата, таа печалбарска прокоба. Без оглед каде сум се наоѓал, некаде по светот или во родниот крај, животната крилатица – татковината е љубов – е мој постојан придружник.
Во оваа пригода, драги деца, издвоив неколку мои песни во кои ги опевам Македонија, мајчиниот јазик, сонцето над нашата земја….
Со љубов,
Саво Костадиновски
Кога пишувам песна за Македонија
Кога пишувам песна за Македонија,
мислите длабоко, длабоко ми тонат,
и, чинам, од камбаните крушевски –
илинденските напеви долго ми ѕвонат.
Кога пишувам песна за Македонија,
го гледам Гоцета со лице сакано,
го гледам Питу, Сандански, Карев,
што создадоа прва Република на Балканот.
Кога пишувам песна за Македонија,
пред моите очи стои една драга слика:
Прилеп со својот востанички Октомври –
победоносно по Илинден в радост блика.
Кога го гледам манастирот „Прохор Пчињски“,
ми се разбиструва и ми станува јасно:
ние постоиме затоа што ги имавме
и Илинден, и Октомври и светиот АСНОМ!
Должни сме…
Должни сме
кон татковината
сите ние:
зборот да го чуваме
и за неа секогаш
со гордост да зборуваме.
Должни сме
кон татковината
сите ние:
песната да ја чуваме,
да ја пееме
и со гордост
да се радуваме.
Должни сме кон татковината
сите ние:
да ја сакаме
да ја цениме
и почитуваме
и -каде и да отпатуваме
по светот бел –
татковината мила
да не ја забораваме-
да ја посетуваме.
Наместо белешка за авторот
Саво Костадиновски е македонски и германски поет, раскажувач, патописец, публицист, писател за деца и возрасни, препејувач. Роден е во 1950 г., во Ботуше, Македонски Брод, а од 1971 г. живее и работи во Германија. Добитник е на наградата „Иселеничка грамота“ на Матицата на иселениците на Македонија, како и на почесно признание од Сојузот на германските писатели, по повод 25-годишното членство и соработка.
Костадиновски досега издал стотина книги, а негови творби се објавувани во списанија за деца и возрасни во земјава, а преведуван е на српски, хрватски, романски и на германски јазик. Член е на ДПМ од 1989 година.
