Изненадувачки податоци во нова научна студија
Може да има милијарди луѓе повеќе што живеат на Земјата отколку што се мисли во моментов, се тврди во една нова студија, која констатира дека бројките на руралното население низ светот би можеле да бидат многу потценети.
Во моментов ОН проценуваат дека светската популација е околу 8,2 милијарди, што се предвидува да достигне врв на над 10 милијарди до средината на 2080 година.
Сепак, истражувањето, објавено во списанието „Нејчр комјуникејшнс“, покажа дека руралното население во овие процени може да било недоволно преброено помеѓу 53 до 84 отсто во периодот на проучувањето помеѓу 1975 и 2010 година.
„Ова е извонредно, бидејќи безброј студии ги користеа овие збирки на податоци без да се сомневаат во нивната точност во руралниот домен“, пишуваат научниците.
Научниците велат дека недостигот од соодветни референтни податоци ги спречил обидите за сеопфатно мерење на точноста на глобалните збирки на податоци за населението. Тие предупредуваат дека постојат „фундаментални ограничувања“ со националните пописи на населението, особено при мерењето на руралното население.
„Заедниците на оддалечени локации или погодени од конфликти и насилство се тешко достапни, а попишувачите често на пописите се соочуваат со јазични бариери и отпор кон учеството“, пишуваат истражувачите.
Повикувајќи се на пример, тие велат дека пописот во 2012 година во Парагвај „можеби пропуштил четвртина од населението“.
– Нашата студија за првпат дава докази дека значителен дел од руралното население може да недостига во глобалните збирки на податоци за населението. Резултатите се извонредни, бидејќи овие збирки на податоци се користени во илјадници студии и опширно го поддржуваат донесувањето одлуки, но нивната точност не е систематски проценета – рече Јосијас Ланг-Ритер, коавтор на студијата од Универзитетот во Алто.
Истражувачите ги процениле петте најшироко користени глобални збирки на податоци за населението што ја мапираат планетата во рамномерно распоредени мрежни ќелии со висока резолуција со броење на населението врз основа на податоците од пописот. Тие потоа ги споредија овие бројки со податоците за преселување од над 300 проекти за рурални брани во 35 земји.
– Ваквите податоци за преселување можат да обезбедат независно собрани споредбени точки за движењето на луѓето меѓу руралните и урбаните области – велат научниците.
Овие податоци за преместување обично се прецизни, како што велат тие, бидејќи компаниите за брани им плаќаат компензација на погодените.
Истражувачите особено се фокусираа на мапите од 1975 до 2010 година поради недостиг од податоци за браната од подоцнежните години.
Според студијата, збирките на податоци од 2010 година имале најмала пристрасност, а недостигаат од една третина до три четвртини од руралното население.
Сепак, истражувачите велат дека постои „силна причина“ да се верува дека дури и најновите податоци пропуштаат дел од глобалното население.
– Иако нашата студија покажува дека точноста е малку подобрена со децении, трендот е јасен: глобалните збирки на податоци за населението пропуштаат значителен дел од руралното население – рече д-р Ланг-Ритер.
Студијата не нуди нова глобална процена на населението, но се наведува дека дури и во најточната база на податоци, руралното население е „потценето за половина во споредба со пријавените бројки“.
Дури и ако најновите мапи на населението се поблиску до реалноста, истражувачите предупредуваат дека претходните збирки на податоци влијаеле врз донесувањето одлуки со децении и може да обезбедат „искривена слика“ за движењето на луѓето од селата во градовите.
Додека недоволното броење изгледаше системско низ светот, истражувачите открија дека несогласувањата се особено забележливи во Кина, Бразил, Австралија, Полска и Колумбија, каде што информациите беа полесно достапни.
Најновите наоди имаат „далекосежни последици“, според истражувачите, бидејќи сегашните процени сугерираат дека над 40 отсто од 8,2 милијарди луѓе во светот живеат во рурални области.
Тие предупредуваат дека потребите на руралните жители би можеле да бидат недоволно застапени во донесувањето одлуки на глобално ниво.
На пример, научниците велат дека моментално користените податоци може да придонесат за недоволна здравствена заштита и транспортни ресурси што се распределуваат за руралните региони од страна на креаторите на политиките.
– За да им обезбедиме на руралните заедници еднаков пристап до услуги и други ресурси, треба да имаме критичка дискусија за минатите и идните апликации на овие мапи на населението – рече д-р Ланг-Ритер.
Научниците бараат многу позасилени пописи на населението, алтернативно пребројување на населението и побалансирана калибрација на моделите на населението за да се поправат неточностите идентификувани во студијата.
