- Наречен зелен кардинал поради носењето облека со воени мотиви, која ја популаризираше неговиот шеф Зеленски, некогаш малку познатиот адвокат и продуцент на филмови од Б-категорија, Јермак, забележа подем за да стекне огромно влијание како главен помошник на украинскиот лидер и од многумина практично беше виден како копретседател
Заминувањето на Андриј Јермак од функцијата семоќен началник на кабинетот на претседателот Володимир Зеленски е тектонски потрес за Украина, што отвора фронт за жестока битка за начинот на управување со земјата.
Наречен зелен кардинал поради носењето облека со воени мотиви, која ја популаризираше неговиот шеф Зеленски, некогаш малку познатиот адвокат и продуцент на филмови од Б-категорија, Јермак, забележа подем за да стекне огромно влијание како главен помошник на украинскиот лидер и од многумина практично беше виден како копретседател.
Опозициските политичари ќе го искористат неговото заминување поради скандал со корупција од 100 милиони долари за да го истакнат својот апел за влада на национално единство во Киев, што го бараат уште од почетокот на војната пред речиси четири години, а заминувањето на Јермак ќе ги охрабри тие фракции.
И нема сомнение дека на Зеленски ќе му недостига „челичниот“ поранешен адвокат. Многу украински коментатори го сметаат Јермак за продуцент во владејачкиот дуопол – со поранешниот ТВ-комичар, кој стана претседател во главната улога. Сега Зеленски ќе биде без својот „продуцент“ додека се подготвува за напнати преговори со САД околу мировниот план на претседателот Доналд Трамп за ставање крај на војната на Русија против Украина.
Сепак, Јермак нема да биде оплакуван. Неговата монополизација на моќта предизвика големи критики и фрустрации, како во Украина така и од западните сојузници. Не е изненадувачки што украинските опозициски политичари и поранешни функционери што се бореа против Јермак ја поздравија веста за неговото заминување, велејќи дека се надеваат оти тоа ќе означи голема промена во начинот на кој владее Зеленски и отстапување од неговиот строго контролиран стил на владеење.
– Не верував дека е можно некогаш да си замине – рече поранешен висок украински функционер, кој побара анонимност за да не биде посочен, како што самиот истакна, како „некој што танцува на политичкиот гроб на Јермак“.
Критичарите на Јермак, исто така, посочија на крајно неуспешните потези на Зеленски спроведени летоска, за ограничување на независноста на антикорупциските агенции во Украина – чекор што првично ги засили стравувањата дека владата го заострува својот притисок врз институциите што треба да ја контролираат претседателската моќ.
Поранешната вицепремиерка Ивана Климпуш-Цинцаѕе за „Политико“ изјави дека е несигурна дали скандалот ќе го промени начинот на кој владее Зеленски.
– Токму тоа е прашањето. Начинот на владеење мора да се врати на уставот. Парламентот мора да ја врати својата моќ. Тоа значи дека претседателот мора да се согласи да разговара со сите фракции, ние мора да го преиспитаме односот во парламентот и да формираме вистинска влада на национално единство, која ќе биде одговорна пред парламентот, а не пред претседателската канцеларија – рече таа.
Јулија Мендел, украинска новинарка и поранешна советничка на Зеленски, која стана критичарка на претседателот, изјави дека оставката на Јермак е „очајна реакција на неподнослив притисок“.
– Зеленски нема подготвено вистинска замена бидејќи никогаш не помислил дека работите ќе одат толку далеку. Но жештината стана толку интензивна што се сведе на наједноставниот избор: тој или Јермак. И Зеленски се избра самиот себеси – додаде Мендел.
Но таа има сомнежи дека работите навистина ќе се променат многу.
– Јермак можеби ќе остане да ги влече конците од сенка – предупреди Мендел.
