Водечки хрватски производител на оружје ги објаснува причините зошто не може да се зголеми производството
Две години по почетокот на војната во Украина, Европската комисија усвои стратегија за одбранбената индустрија.
Колку е запоставена европската воена индустрија покажува податокот дека Унијата 68 отсто од оружјето за Украина купила од САД. Планот е значително да се зголеми производството до 2030 година, па за тоа се предлага да се издвојат една и пол милијарда евра. Во пресрет на европските избори сѐ почесто се зборува за нова функција во Европската комисија – комесар за одбрана.
Жељко Павлин, претседател на Управниот одбор на „ХС продукт“, водечки производител на оружје, ја коментираше ситуацијата за телевизијата РТЛ.
Што би значела оваа стратегија на Европската Унија за вашата компанија?
– За нашата компанија ова во основа е позитивен чекор, но не гледаме дека нешто посебно ќе се промени во нашиот бизнис.
Што би значело промена на пазарот? Важно ли ви е дали извезувате во Америка или во Европа?
– Како приватна компанија, пазарот ни е важен, без разлика каде се наоѓа. Важно е да имаме производ што можеме да го продадеме и да го наплатиме.
Колку произведувате во моментов?
– Во последните неколку години произведуваме и продаваме приближно 500.000 пиштоли годишно.
Ако тоа го бара стратегијата, имате ли простор да го зголемите производството?
– Не само ако тоа го бара стратегијата. Ако дојде нарачка, би можеле да го удвоиме за краток временски период. Капацитетот нема да биде проблем. Единствениот проблем е дали има потреба од тоа.
Една од работите е што производството се шири. Снемува муниција, гранати… Дали е тоа насоката во која би оделе?
– Ги разгледавме опциите за производство на мало оружје. Теоретски, би можеле да навлеземе во тоа, но повторно останува прашањето за пазарот, огромните инвестиции и местата каде што треба и може да се направи. Проблемот, релативно кажано, е да се направи самиот куршум. Куршумот се состои од три или четири клучни компоненти. За чаурите и зрното може да се обезбеди производство. Најголем проблем се барутот и иницијалните каписли, бидејќи не знам дали има повеќе од две-три фабрики за барут во Европа.
Дали е голем проблем производството на гранати?
– Производството на гранати е голем проблем. Токму затоа треба да се зголеми производството на барут во Европа, а за барутот се потребни суровини што се увезуваат надвор од Европа. Најчесто се наоѓаат во Русија и во Африка, а многу африкански рудници се преземени од кинески компании.
