Бренд-менаџерот за маркетинг во компанијата „Дип роботикс“, Сијан Сијаоју, ја истакна водечката улога на Кина во користењето роботи за подземни итни акции за спасување, при неговото обраќање на медиумскиот настан наречен „Новоквалитетни продуктивни сили и кинеска модернизација“, одржан минатата недела на Хајнан. Сијаоју даде детално објаснување за примените на различните модели, понатамошните чекори за развој на роботиката, како и за соработката со странски партнери, со цел да се прошири работата на неговата компанија надвор од Кина
Роботите претставувани пред само неколку години честопати правеа бавни и несмасни движења и не изгледаа применливо во секојдневни услови, додека најновите модели со значително зголемена мобилност имаат корисна примена при итни спасувачки акции и во индустријата, благодарение на нивните напредни способности. Токму изведбата на моделот „Џуејинг лајт 3“ (Jueying Lite 3) на кинеската технолошка компанија „Хангџоу Јуншенчу технолоџи“, позната и како „Дип роботикс“ (Hangzhou Yunshenchu Technology Co., DEEP Robotics), на демонстрација одржана на кинескиот остров Хајнан, е показател за импресивните научни достигнувања на Кина. Роботското куче изведуваше разни скокови, се исправаше на две нозе и беше водено на ремче како вистински пес, а при неговото намерно поттурнување отстрана, во рамките на демонстрацијата, успеваше набрзо да ја врати рамнотежата.
Бренд-менаџерот за маркетинг во „Дип роботикс“, Чијан Сијаоју, ја истакна водечката улога на Кина во користењето роботи за подземни итни акции за спасување, при неговото обраќање на медиумскиот настан наречен „Новоквалитетни продуктивни сили и кинеска модернизација“, одржан минатата недела на Хајнан. Сијаоју даде детално објаснување за примените на различните модели, понатамошните чекори за развој на роботиката, како и за соработката со странски партнери, со цел да се прошири работата на неговата компанија надвор од Кина.
– Првиот аспект е користење на роботот за едукација и истражување и со него многу повеќе луѓе и држави ќе добијат шанса за употреба на роботика. Пред неколку години роботиката беше многу скапа, но со вклучувањето повеќе луѓе и компании, ќе има повеќе примени во Кина и ќе биде повеќе охрабрена да ги користи во секојдневниот живот. Примарна цел за нашите роботи е да им помагаат на луѓето со опасните и здодевни работни задачи. Главната функција на помалиот модел е за едукација и истражување, а поголемиот има примена во индустријата. Имаме роботи што се користат во итни спасувачки мисии. Кина ги помести границите во повеќе сектори – наведе Сијаоју.
Тој ги посочи контролата на движењата и перцепцијата на роботот, како и процесот на носење одлуки, меѓу идните чекори на кои треба да се посвети внимание во развојот на роботиката, додавајќи дека вештачката интелигенција станува сѐ поважна за функционирањето на роботите.
– Првиот чекор е контролата на движењата, а вториот е за перцепцијата, употребата на засебни стратегии за движење по различни површини. Потоа доаѓаме до процесот на носење одлуки. Тој е многу комплексен и тежок, бидејќи претставува предизвик не само за роботот туку и за вештачката интелигенција што го придвижува. Вештачката интелигенција станува сѐ поважна. Сега главно се користи за тренинг на движењата, а во иднина повеќе ќе биде вклучена во носењето одлуки. Но за тоа е потребен голем напредок на вештачката интелигенција, не само на роботиката – објасни Сијаоју.
Соработката со странски партнери за проширување на работата на компанијата надвор од Кина, како и предизвиците во тој процес, исто така беше меѓу дискутираните теми со Сијаоју.
– Имаме многу партнери во Западна и во Источна Европа и веќе нудат решенија за локалниот пазар. Станува збор за Германија, Велика Британија и Полска. Во Кина имаме поинакви стандарди во однос на европскиот пазар и соработуваме со партнерите што ги познаваат тамошните состојби. Веќе имаме домашни решенија за Европа. Употребата на роботот зависи од инсталираните модели за функционирање, па за европскиот пазар ги користиме тамошните модели. Европа има голем број правни и технички барања и потребно е многу време за нашиот тим да ги научи во соработка со локалните партнери – напоменува Сијаоју.
Водечки луѓе и експерти од големите кинески технолошки компании во рамките на настанот дискутираа за најнапредните технологии, вклучувајќи ги вештачката интелигенција, дроновите, анимацијата и визуелните ефекти. На тој начин беше даден вистински приказ за актуелните технолошки достигнувања на Кина и посветеноста на понатамошно усовршување на ова поле.
Милко Живковиќ, наш известувач од Кина
