Тие се во раните 20-ти години, имаат знаење за вештачката интелигенција и многумина од нив заработуваат и по милион долари годишно
Тешко време е да се биде млад човек што бара работа, освен ако не сте во индустријата за вештачка интелигенција (АИ). Пазарот на трудот за работници со основни квалификации е во континуиран пад. Стапката на невработеност кај новите дипломирани студенти беше 4,8 отсто во јуни, според Федералната резервна банка на Њујорк, во споредба со четирите отсто за сите работници. Иако вештачката интелигенција е делумно одговорна за ваквата состојба, постои светла точка кога станува збор за кадрите со потребно искуство во машинското учење. Тие се во раните 20-ти години, имаат знаење за вештачката интелигенција и многумина од нив заработуваат и по милион долари годишно.
Основните плати за неменаџерските работници во полето на вештачката интелигенција, без или со искуство до три години, пораснаа за околу 12 отсто од 2024 до 2025 година, што е најголемото зголемување за која било група работници што поседуваат работно искуство, според новиот извештај на фирмата за вработување поврзано со вештачката интелигенција „Брч воркс“, која ги анализира надоместоците на илјадници кандидати за работа во индустријата со вештачка интелигенција и со анализа на податоци. Извештајот, исто така, откри дека луѓето со искуство во вештачката интелигенција се унапредуваат на менаџерски позиции приближно двојно побрзо од нивните колеги во други технолошки области. Тие напредуваат како резултат на нивните вештини и влијание наместо поради годините поминати во работен ангажман.
„Датабрикс“, компанијата за софтвер за анализа на податоци чија вредност драстично се зголеми за време на бумот на вештачката интелигенција, планира годинава тројно да го зголеми бројот на луѓе што ги вработува веднаш по завршувањето на студиите, делумно поради нивното познавање на вештачката интелигенција.
– Тие ќе дојдат и сите ќе бидат запознаени со вештачката интелигенција, додека ни за цел живот не можеме да ги натераме постарите луѓе да ја усвојат – вели Али Годси, извршен директор на компанијата.
Научник за истражување на генеративна вештачка интелигенција со две години искуство може да заработува основна плата помеѓу 190 и 260 илјади долари во „Датабрикс“, според страницата за огласи за работа на компанијата. Вклучувајќи ги и грантовите за акции, вкупната компензација може да биде многу поголема.
– Дефинитивно имаме доста помлади луѓе, кои имаат големо влијание и се високо платени. И пред 25-годишна возраст можете да заработите милион долари – посочува Годси.
Но постои поделба дури и на пазарот за работници со искуство со вештачка интелигенција, како што истакнува Лесковец, професор по компјутерски науки на Универзитетот „Стенфорд“ и коосновач на стартап поврзан со АИ. Тој гледа како докторанди во раните 20-ти години прават ефективни истражувања, рано ги напуштаат своите програми и се „грабнати“ од компании со големи парични понуди пред да имаат какво било искуство во индустријата.
Потоа има и такви што се вешти во користењето на вештачката интелигенција.
– Тие учат брзо, размислуваат брзо и се способни да ја искористат технологијата за да бидат поефикасни. Иако немаат дипломи, јазот меѓу нив и конвенционалните програмери се проширува – вели Лесковец.
Сирил Горла е коосновач на стартапот „Си-ти-џи-ти“ што произведува софтвер за безбедност и корпоративен ризик, дизајниран да решава одреден проблеми поврзани со вештачката интелигенција, меѓу чии инвеститори е и компанијата „Гугл“. Тој вели дека просечната возраст на вработените во неговата компанија е 21 година, додека вредноста на нивниот капитал во акции сега изнесува околу 500 илјади долари. Горла, кој има 23 години, добива барања од сè помлади кандидати, вклучувајќи и 16-годишник, кој веќе имал објавен труд на конференција за вештачка интелигенција.
