Најголем дел од богатството на Мекензи Скот доаѓа од акциите на „Амазон“ што таа ги доби кога се разведе од основачот на компанијата, Џеф Безос. „Форбс“ го проценува нејзиното моментално богатство на 31,7 милијарда долари, дури и по донираните пари во изминатите пет години
Поранешната сопруга на Џеф Безос донира над 19 милијарди долари во изминатите пет години
Милијардерката и филантропка Мекензи Скот информира за донации во вредност од уште две милијарди долари во блог-објава во средата, со што вкупниот износ што таа го подари од 2019 година се проценува на 19,2 милијарди долари.
Таа исто така откри нови информации за тоа како управува со своето богатство, велејќи дека ги упатила советниците да ги инвестираат нејзините средства во „потфати усогласени со мисијата“. Повеќето од грантовите што ги додели годинава, како што истакна таа, беа наменети за зајакнување на економската безбедност и можности.
– Го замолив инвестицискиот тим да ми помогне да управувам со средствата, со што веќе работам на нивно раздавање на фондови и компании фокусирани на профитни решенија за овие предизвици – напиша Скот.
Најголем дел од богатството на Скот доаѓа од акциите на „Амазон“ што таа ги доби кога се разведе од основачот на компанијата, Џеф Безос. „Форбс“ го проценува нејзиното моментално богатство на 31,7 милијарда долари, дури и по донираните пари во изминатите пет години.
Габриеле Фицџералд, основачка и извршна директорка на групацијата „Панорама“, го истражуваше донирањето на Скот и даде совети и поддршка за непрофитните организации што ги добија донациите. Таа рече дека во донирањето на Скот се забележува сѐ поголем фокус кон прашањата поврзани со сиромаштијата.
– Таа создава неверојатен пример за филантропите, иако не гледам многумина што го следеле. Но тоа навистина покажува дека е лесно да се подарат многу пари – рече Фицџералд.
Скот, која не дава коментари за нејзиното донирање, настрана од ретките објави на нејзината веб-страница, го потресе непрофитниот сектор со нејзината „прегратка“ врз т.н. „филантропија заснована на доверба“, обезбедувајќи големи грантови поврзани со над 2.450 непрофитни организации. Годинава Скот постави висока граница за тоа колкава сума и колку брзо мегадонаторите можат да донираат. Две организации, ЦАМФЕД, која го поддржува образованието на девојчињата во Африка, и УМД добија трета донација од Скот годинава.
Корисниците на грантови истакнуваат дека кога тимот на Скот ги известува за доделувањето грантови, тие одговараат оти не очекуваат дополнителна поддршка. Токму затоа беше изненадување за Шон Донован, извршен директор на организацијата за достапно домување „Ентерпрајз комјунити партнерс“, кога доби вест за втора голема донација.
– Го вадев багажот на аеродромот „Ла Гвардија“ кога ми заѕвони телефонот и ми беше кажано дека Мекензи Скот ни доделува уште 65 милиони долари – истакна Донован во интервју во ноември.
Неговата организација доби 50 милиони долари од Скот во 2020 година, што ги прави една од непрофитните организации што добија најмногу средства од Скот, врз основа на податоците за грантови објавени во јавноста.
– Обемот на донирање на Скот навистина промени не само поединечни организации туку и цели сфери, како што е онаа за достапни станови – рече Донован.
Годинава првпат се случи милијардерката да додели грантови преку процес на аплицирање. Скот изненади со тоа што им додели повеќе пари на поголем број организации отколку што првично беше ветено, обврзувајќи 640 милиони долари за повеќе од 360 непрофитни организации. Во одреден случај за грантовите што Скот ги дава, 6.353 непрофитни организации се пријавија преку непрофитна организација што го реализираше „отворениот повик“ во име на милијардерката. На крајот, 279 непрофитни организации добија по два милиона долари, додека 82 организации добија по еден милион долари.
