Сериозна најава на метеоролозите
Метеоролозите велат дека 2025 година се оформува како најактивна сезона на торнада во последните 14 години – и сè уште не е завршена. Досега имало повеќе од 750 прелиминарни извештаи за торнада, што е повеќе извештаи до средината на мај отколку во која било друга година од 2011 година.
– Ова беше исклучително опасен почеток на пролетната сезона на лоши временски услови во САД. Забележавме нагло зголемување на бројот на пријавени торнада во текот на март и почетокот на април. За жал, очекуваме овие бројки да продолжат да се зголемуваат во следните неколку дена – изјави еден од водечките метеоролози на „Акуведр“, Берни Рејно.
Зголемената активност е загрижувачка, но доаѓа по речиси историски највисоките нивоа минатата година. Лошите временски услови во 2024 година резултираа со втор најголем број торнада откако започна водењето евиденција во 1950 година, според Националната метеоролошка служба. И покрај речиси историската година, 54-те смртни случаи поврзани со торнада беа далеку под 20-годишниот просек.
Оваа година смртоносни „вртелешки“ го погодија поголемиот дел од источниот дел на САД, но во март беа пријавени и во областа на Лос Анџелес. Во април тие убија луѓе на југот и на средниот запад, исфрлајќи остатоци во воздухот. Во март жителите на Мисисипи се криеја во своите автомобили додека торнада им го уништуваа домот. Голем дел од неодамнешната активност беше надвор од регионот познат како „алеја на торнада“, кој вклучува широк дел од централниот и јужниот дел на САД. Наместо тоа, се случи кон исток, освен во Тексас. Имаше десетици смртни случаи, соопшти Центарот за филантропија при катастрофи.
Неделава се очекуваат повеќе торнада заедно со голем град во областите од долината на Мисисипи до Големите Езера. Торнадата може да се случат во секое време, но обично достигнуваат врв од март до јуни. „Акуведр“ предвидува дека ќе има од 1.300 до 1.450 торнада низ САД годинава: бројка што е над историскиот просек од 1.255 торнада.
Научниците сè уште проучуваат како се формираат торнадата, надевајќи се дека ќе можат да им обезбедат на Американците побрзо време на предупредување што би можело да спаси животи. Дотогаш метеоролозите ја нагласуваат важноста од подготовката за таква вонредна состојба.
– Нашата анализа на записи што датираат од 1950 година покажа дека 25 мај е статистичкиот врв со најмногу пријави за торнада на тој датум. Подготвеноста може да ви го спаси животот – рече главниот метеоролог на „Акуведр“, Џонатан Портер.
