Кога летото полека почнува да се приближува кон крајот, тоа е идеален момент за освежување на домот. Додека природата полека преминува од жештина во блага есенска свежина, и нашиот дом станува место што бара освежување. Нов слој боја или нежна текстура на ѕидовите може да внесе сосема поинаква атмосфера, потсетувајќи нѐ дека сезонските промени не се резервирани само за облеката и пејзажите туку и за просторот во кој живееме.
Токму почетокот на есента е време кога молерските работи доаѓаат до израз: ѕидовите побрзо се сушат, воздухот е доволно сув и пријатен, а свежината што ја носи новата боја станува природен вовед во сезоната во која повеќе престојуваме во затворен простор.
Сувиот воздух го забрзува сушењето на бојата и го намалува ризикот од дамки, капење или нерамномерно сушење, додека умерената температура ја олеснува работата и спречува прекумерно брзо сушење – што кај некои бои може да доведе до неправилна текстура. Добри се условите и за вентилација: отворените прозорци и протокот на воздух помагаат за испарувањата и го зголемуваат комфорот за време на работата.
Еден од трендовите во пораст, особено за сезоната есен/зима, е познат како „нијансирање со бои“. Тоа е нов трик што експертите за дизајн го користат за собата да изгледа поголемо и подразбира користење нијанси на истата боја – посветла на ѕидовите, средно светла на лентите и потемна на таванот, кои создаваат ефект на сенка што дава длабочина и прави таванот да изгледа повисоко. Оваа техника додава димензија, ги нагласува архитектонските детали и може оптички да го зголеми просторот. Исто така и муралите се враќаат во живот. Некогаш резервирани само за фасадите на зградите и јавните површини, муралите во последниве години станаа едно од најпосакуваните решенија и во внатрешното уредување.
