Минималистичкиот скандинавски стил на декорација е популарен со години, а негов голем ривал е пошарениот опуштен калифорниски стил. Но не мора да се одлучите само за една опција, бидејќи сега сѐ повеќе луѓе воведуваат хибрид од овие две насоки во дизајнот на ентериерот во својот дом. Таканаречениот скандифорниски стил на декорација има сè поголем број обожаватели во светот. Тоа е комбинација на едноставната скандинавска елеганција и лежерниот бохо-изглед специфичен за домовите во Калифорнија.
Чисти линии: за да може калифорнискиот бохо-стил во просторот за живеење да биде компатибилен со скандинавскиот, потребно е внимателно да се изберат парчињата мебел и декоративните елементи. Премногу предмети од калифорнискиот стил во еден простор може да резултираат во неуреден изглед и помалку да се вклопат во скандинавската визија за дизајнот.
Затоа љубителите на скандинавскиот изглед на ентериерот се потпираат на јасни прави линии и минималистички украси и често користат огледала што рефлектираат светлина и со тоа подобро го осветлуваат просторот.
Џунгла во дневната: за врвен скандинавски шик, ја внесуваме природата во нашиот дом. Особено големите растенија, како што се смоквите и маслиновите дрвја или бананата, кои создаваат сончев калифорниски дух во просторот за живеење.
Природни материјали: направете го тоа природно и едноставно – би било мотото на скандинавскиот стил на декорација. Природните материјали како јута, лен или ратан се особено примамливи за внатрешен дизајн. Тие предизвикуваат асоцијации со море, што е целосно во согласност со начинот на живот во Калифорнија.
