Според психолозите, оние што се послаби во социјалните вештини се поподготвени да започнат комуникација во писмена форма, бидејќи и полесно можат да ја прекинат. Социјалните мрежи сѐ повеќе се користат за љубовни средби, иако сè уште постојат одредени негативни предрасуди во врска со тоа. Некои сè уште веруваат дека овој начин на поврзување не може да биде алтернатива на спонтаните состаноци во живо. Реалноста е дека луѓето често започнуваат врски со некој што го запознале преку интернет, на различни апликации и мрежи. Судбината на таквите врски е слична на повеќето од оние што започнуваат на други начини. Некои се развиваат во долги и сериозни врски, па дури и завршуваат со брак. Во денешно време тие стануваат секојдневие, како поради времето поминато во виртуелниот простор така и поради забава и дружење.
Луѓето често се одлучуваат да прават ваков тип состаноци кога немаат доволно можности да запознаат луѓе во средината во која живеат. Исто така, на оние што можеби се послаби во доменот на социјалните вештини понекогаш им е полесно да почнат да комуницираат во писмена форма, бидејќи не се толку експонирани како што би биле лично. При ваков тип допишување полесно можат да излезат од комуникацијата. Се појавуваат и паралелни врски, и реални и виртуелни. Луѓето најчесто го прават тоа кога на некој начин се незадоволни од партнерот, се оддалечиле еден од друг, им недостигаат љубов и внимание, а онлајн светот е лесно достапен. Можеме ли да го обвиниме мобилниот телефон за лошо влијание врз бракот? Психолозите се согласуваат дека колку е повисок квалитетот на реалната врска со партнерот и колку повеќе се задоволуваат нашите потреби во таа врска, толку помалку ќе има искушенија. Се разбира, никој не е целосно имун на тоа, па дури и стабилните двојки може да имаат проблеми ако некој поминува премногу време во онлајн кореспонденција.
Психолозите предупредуваат дека врските во иднина може да станат поповршни. Можеби имаме помала емпатија кон другите и намалено чувство на одговорност за она што го правиме и зборуваме, бидејќи сè е некако полуреално. Сепак, зад телефонот стојат луѓе со сите свои чувства, слабости и потреби и тоа треба да го имаме на ум. Од друга страна, ни отвора широко поле да запознаеме луѓе што не би ги сретнале во реалниот живот, кои се послични на нас, нашите интереси и начин на живот, зголемувајќи ги нашите шанси за формирање врска и пополнување на празнината што ја имаме.
Полека се движиме кон тоа технологијата да стане сосема легитимен и вообичаен начин на запознавање луѓе. На некој начин тоа е и очекувано, со оглед на тоа колку е таа присутна во нашите животи на дневна основа.
