ОДБОЈКА
Одбојкарската федерација на Македонија (ОФМ) и селекторот на женската сениорска репрезентација на Македонија, Стефан Пауновиќ, ја завршија соработката. Српскиот одбојкарски стратег во изминативе четири години успешно ја извршуваше оваа функција, која финишираше со квалификацискиот циклус за Европското првенство (ЕП) 2026.
ОФМ му се заблагодарува на Пауновиќ за професионалниот однос, разбирањето, убавата енергија во работата и успесите што женската репрезентација на Македонија ги направи со него како селектор. Сега двете страни се насочуваат кон новите предизвици. Стефан Пауновиќ продолжува со работа со неговиот клуб Ново Место од Словачка, за кој настапува и македонската репрезентативка Ерјона Јонузи. Одбојкарската федерација на Македонија до крајот на 2025 година ќе го именува новиот селектор на женскиот национален тим, велат од ОФМ. Г.И.
