Дали сте знаеле…
Ватиканска апостолска библиотека (латински: Bibliotheca Apostolica Vaticana), честопати нарекувана Ватиканска библиотека) – библиотека на Светиот престол, е сместена во Ватикан. Официјално основана во 1475 година, иако е многу постара, таа е една од најстарите библиотеки во светот и содржи една од најзначајните збирки на историски текстови. Библиотеката располага со 75.000 кодекси од различни историски периоди, како и со 1,1 милион печатени книги, кои вклучуваат околу 8.500 примероци од почетоците на печатењето.
Ватиканската библиотека е истражувачка библиотека за историја, право, филозофија, природни науки и теологија. Библиотеката е отворена за секој што може да ги докаже своите квалификации и потребата за истражување. Фотокопии за приватни истражувања од страници на книги објавени помеѓу 1801 и 1990 година можат да се побараат лично или преку пошта.
Во март 2014 година Ватиканската библиотека започнала четиригодишен проект на пренесување на својата колекција на ракописи во електронска форма.
Тајните архиви на Ватикан биле одделени од библиотека на почетокот на 17 век и тие содржат 150.000 други писанија.
(Од Википедија на македонски јазик)
