Медицински совет
Британска фармацевтска компанија соопшти дека започнала студија во која учествуваат повеќе од милион постари возрасни лица во Обединетото Кралство за да истражи дали најпродаваната вакцина против херпес зостер „шингрикс“ го намалува ризикот од деменција.
Британскиот производител на лекови собира здравствени податоци од околу 1,4 милион луѓе на возраст од 65 до 66 години, од кои некои примиле вакцина „шингрикс“, а некои не. Директорот за научни истражувања Тони Вуд потврди дека податоците од големата база на податоци на британската државна Национална здравствена служба претставуваат единствен сет на корисни информации. Кога националната програма за вакцинација против херпес зостер беше проширена во 2023 година, луѓето на возраст од 65 години и постари станаа квалификувани за вакцинација, додека пред 2023 година, само лицата на возраст од 70 години и постари беа подобни. Новата студија спроведена од ГСК во партнерство со Институтот за истражување на деменција во Обединетото Кралство и Агенцијата за анализа на здравствени податоци во Обединетото Кралство треба да обезбеди подетален увид во проблемот со деменцијата.
Доколку се потврди ефикасноста на вакцината „шингрикс“ во лекувањето на деменција, ГСК би можела да преговара со британските регулатори за да добие дозвола за употреба на лекот во борбата против ова тешко невролошко нарушување. Повеќе од 55 милиони луѓе низ светот страдаат од деменција, а со децении полето на истражувањето за Алцхајмерова болест е обележано со неуспех. Сепак, во тек се неколку клинички испитувања за група лекови против Алцхајмерова болест, кои на крајот би можеле да резултираат со воведување револуционерни терапии.
