По херојскиот гест на деветнаесетгодишниот виничанец што спаси 21 млад живот
„Да си жив и здрав, Јован! Ти благодарам што ни покажа дека имаме младина со која можеме да се гордееме.Да ве цениме вас младите, вашата младост, храброст, сила, вашите соништа и желби, кои сѐ уште не се извалкани од оние погрешни вредности што со години ни се провлекуваат во општеството. Нашите млади, фиданките наши!“
Ова се зборови на Силвана Димитриевска, поетеса, посветени на 19-годишниот виничанец што во големиот пожар што ја зафати дискотеката „Пулс“ во Кочани, на 16 март, во 2.35 часот наутро, ги спаси животите на 21 лице. Всушност, целата јавност во нашата земја е трогната од постапката на ова храбро момче, кое не мислејќи на сопствениот живот, пожртвувано се трудеше до последниот атом на својата сила да им помогне на настраданите.
По една недела мината во болница, на 25 март, Јован се врати дома во добра состојба. Беше хоспитализиран поради белодробни нарушувања предизвикани од вдишана зголемена концентрација на јаглерод моноксид.
Од соучениците и професорите во гимназијата „Ванчо Прке“ во Виница, каде што учи, тој беше пречекан со аплаузи и со прегратки. Неговите другари, кои беа наредени во шпалир, држеа транспаренти со благодарност за неговата пожртвуваност и храброст.
– Денешниот ден покажа дека е време да се завртиме кон некои нови вредности, кон хуманоста, вредности со кои сите млади луѓе треба да се идентификуваат со јунаштвото на Јован. Сега сите сме Јован, бидејќи тој спаси 21 живот на свои врсници. Се надевам дека младите ќе извлечат голема поука од сѐ што ни се случи, ќе умеат да ја ценат хуманоста – изјави Радмила Манчевска, психолог во гимназијата „Ванчо Прке“.
Јован, како што рече во првото интервју за веб-сајтот „Сапорт Кочани“, во заплената дискотека „Пулс“ во Кочани влегол откако го скршил прозорецот од задната страна. Зел црево и почнал да прска внатре. Потоа и самиот се натопил и влегол, бил присебен и знаел како да помага, благодарение на часовите по прва помош што ги посетувал неодамна, зашто сакал да полага возачки испит.
И други присутни помагале да се извлечат луѓето од запалената дискотека, но и да се однесат во блиските и подалечните болници. Еден од нив беше и таксистот Иле Гоцевски, чие срце не го издржа натчовечкиот напор. Во трагичниот настан животот го загубија 59 лица, а најмладата жртва имаше само 16 години. Меѓу повредените се 200 млади луѓе, кои веќе заздравуваат на клиниките во земјава и во странство.
Општина Виница за големата храброст и херојство му додели на Јован плакета за хуманост и стипендија за високо образование во наредните четири години во износ од 6.000 денари месечно.
– Ова е најмалку што можеме да го направиме за нашиот херој, кој во пожарот во дискотеката „Пулс“ во Кочани спаси 21 лице – се наведува во соопштението на градоначалникот на општината Виница, Миле Петков.
Јован исто така доби стипендија од компанијата „Алкалоид“, во износ од 18.000 денари месечно, во наредните четири години.
Mинистерот за здравство Арбен Таравари за Јован напиша дека не е херој само на Кочани туку и на цела наша држава.
„Денеска, со длабока емоција и бескрајна гордост, ви ја споделувам веста дека Јован Костадинов, храбриот млад човек што спаси 21 живот во трагедијата со пожарот во Кочани, конечно се врати дома. Постојат моменти кога зборовите не се доволни, а ова е еден од нив. Како да се опише душа толку храбра и несебична, која во мигови на паника и опасност не помисли на себе, туку само на другите? Јован, кој има само 19 години, постапил како вистински херој. Влегувал повторно и повторно, не еднаш, не двапати, туку повеќе од 20 пати, за да им помогне на оние што биле заробени во пламените. Го ризикуваше сопствениот живот за да спаси други. Неговото тело ги носи лузните од неговото јунаштво, но неговото срце носи нешто многу поголемо: почитта, восхитот и љубовта на цела нација. Јован не е само херој на Кочани тој е херој на целата наша држава“, напиша министерот Таравари на својот профил на социјалната мрежа Фејсбук.
А премиерот Кристијан Мицковски, по средбата со Јован во својот кабинет, минатата недела на својот профил на Фејсбук, меѓу другото, објави: „Денеска се сретнав со Јован Костадинов, млад човек од Виница, кој во најтешкиот миг покажа што значи храброст, одговорност и човечност“.
М.Т.
