Пакувањето е една од радостите на патувањето. Сепак, начинот на пакување зависи од тоа каде одите, колку денови патувате и што носите. Патниците често ги приспособуваат своите листи за пакување според видот на патување што го планираат, а секој вид патување бара различна стратегија. Сепак, постојат одредени предмети што може да бидат корисни без разлика каде одите, па дури и може да бидат спас во различни ситуации, пишува „Хафингтон пост“.
Шал
– Едно нешто што секогаш го носам со себе, без разлика на дестинацијата или времето на летот, е шал. Соодветниот шал може да биде маица, марама за глава, ќебе, перница за врат, маска за очи и друго. Секогаш ми е од корист на долги летови и секогаш жалам ако заборавам еден – вели Габи Бекфорд, експертка за патувања.
Протеински чоколатца
– Секогаш спакувајте грицки. Можеби нема да имате време да земете нешто пред да се тргнете, особено ако редовите за храна и пијалаци се долги. Протеинските чоколатца не зафаќаат многу простор и се лесен здрав начин да го спречите гладот додека сте во движење – препорачува Ник Мотлаг, пилот.
Фотокопија од пасош
– Чувам печатена копија од пасошот во рачната торба, но не и во паричникот. Ако некој ми чепне џебот, секогаш имам подготвена резервна патна исправа. Некои луѓе чуваат и фотографии од нивната лична карта на своите телефони, но ако вашиот телефон се расипе, ја имате таа хартиена копија како резервна – советува Кејти Настро.
Комплет за рачен багаж
– Секогаш пакувам мини-четка за заби, шминка, марамчиња за шминка и маски за дополнителна хидратација. Никогаш не знаете кога може да ви требаат овие предмети, а полесно е да ги извадите од рачниот багаж – вели Дајан Мартин, стјуардеса.
Мантил
– На секое патување носам јакна за дожд или мантил, а тоа ме спасува во многу ситуации. Препорачувам да земете лесен мантил за дожд со качулка и со длабоки џебови. Дури и ако прогнозата не најавува дожд, сепак носам еден мантил бидејќи открив дека прогнозите честопати се неточни – советува Фил Денглер, коосновач на веб-страница за патувања.
Полнач за телефон
– Аеродромите се преполни и сите се обидуваат да ги полнат своите телефони. Имањето полнач значи дека не морам да седам на преполни места само за да го наполнам телефонот – вели Џесика ван Доп де Хесус, уредничка на списание за патувања.
