Животни
Идејата за животно што ќе ве заштити вас и вашето семејство веројатно е отелотворена во куче со големи заби, зашилени уши, големи шепи и мускулесто тело. Но можеби ќе се изненадите кога ќе дознаете дека вашата сонлива и нежна мачка може да покаже и заштитничка страна. Некои мачки се бестрашни, територијални и секогаш на штрек, па ако некој влезе во нивниот дом без јасно добредојде, тие може да се наежат, дури и да нападнат за да му покажат на натрапникот дека се подготвени да го одбранат своето семејство по секоја цена.
Мачките се природно територијални и ако чувствуваат дека треба да го бранат својот простор, тоа ќе го направат агресивно. Колку што чувањето мачка како животно чувар има свои предности, агресивните мачки можат да предизвикаат проблеми со гостите и новите миленичиња. Раната социјализација може да ги ублажи таквите проблеми во однесувањето, како и спокојното воведување на мачките во нови средини. Кастрацијата или стерилизацијата и наградите во форма на задоволства може да ги смират премногу агресивните мачки. Одредени раси на мачки, како што се абисинските и сијамските, имаат посилни територијални особини од другите, но има многу други фактори што ги прават такви.
На пример, норвешка шумска мачка е нежен џин, но секогаш буден, кој бдее над својот дом за да се увери дека сѐ е во ред. Обично е пријателски настроена, освен кон глодачите, за кои нема милост. Оваа мачка сака високи места и дрвја, од каде што бдее над својата територија. Иако независна, таа е лојална и заштитничка кон луѓето. Исто така, турската ангора, иако е елегантна на изглед, е независна и со силна волја и не сака да седи во скут долго време. Таа е интелигентна и љубопитна и сака да биде главна, што значи дека знае кој е на нејзината територија. Сопствениците на оваа мачка тврдат дека таа зазема заштитна позиција против кучињата што доаѓаат во близина на куќата. Таа не е расположена спрема туѓинците, а може дури и да ги гризне. Раната социјализација може да ја намали агресијата кон странци, а стресот и анксиозноста може да предизвикаат агресивно однесување. Ако е нервозна околу посетителите, замолете ги да го почитуваат просторот на мачката така што ќе ја игнорираат додека таа не одлучи да дојде кај нив.
