Иницијативи
Со средба со роднокрајната авторка Андриана Ристеска, ООУ „Кире Гаврилоски-Јане“ од Прилеп го заокружи одбележувањето на Месецот на книгата, кој секоја година се одбележува од 15 октомври до 15 ноември.
Учениците под менторство на наставничката по македонски јазик Сузана Николоска се претставија со опширна презентација за книгата, нејзиното значење, мудри мисли за книгата, книжевните саеми, македонските автори и начините на кои се одбележува Месецот на книгата од 15 октомври до 15 ноември.
Поетесата Андриана Ристеска им прочита дел од нејзиното творештво и ги претстави нејзините две објавени книги, а дел од своето творештво претстави и младата поетеса Тамара Насевска. Следуваа дискусија за слушнатата поезија, прашања, одговори и разговор за творештвото, начинот на пишување и времето и инспирацијата што се потребни да се создаде една песна.
На крајот, задоволните ученици, наставничката и гостите си ветија повторни средби и дружби со нејзиното величество книгата.
Инаку, во рамките на одбележувањето на Месецот на книгата, третоодделенците од ова училиште со наставничките Розита Кареска и Верица Таневска ја посетија градската библиотека „Борка Талески“, каде што имаа можност да се запознаат со книжниот фонд на библиотеката, рецитираа песнички, кажаа понекоја убава мисла и во библиотеката ги оставија нивните цртежи и мудри мисли за книгата.
Исто така, во училиштето беше промовирана и книгата за деца „Мачорот Тане“ од роднокрајната авторка Лина Димоска пред дел од третоодделенците, а средбата беше во организација на наставничката Кети Стевананџија.
Мудри мисли
О, колку е добро да се биде меѓу луѓе што читаат книги. – Рајнер Марија Рилке
Книгата е подарок што можеш да го отвораш одново и одново. -Јосип Бродски
Човекот што не чита добри книги не е нималку подобар од човекот што воопшто не чита. – Марк Твен
Еден ден прочитав книга и цел живот ми се промени. – Орхан Памук
Дождливите денови треба да се поминат дома, со филџан чај и добра книга. – Бил Ватерстон
Никогаш не оставај ја за утре книгата што можеш да ја прочиташ денеска. -Холбрук Џексон
Толку многу книги, а толку малку време. – Франк Запа
Книгата е сон што го држите в раце. – Нели Гејман
Книгите се единствена магија што се пренесува. – Стивен Кинг
Повеќе богатство има во книгите отколку на цел остров со богатство. – Волт Дизни
Некои важни датуми поврзани со книгите и со читањето
3 февруари – Светски ден на читањето наглас
21 март – Светски ден на поезијата
2 април – Светски ден на литературата за деца
23 април – Светски ден на книгата и авторското право
15 октомври-15 ноември – Месец на книгата
