Драги деца, и денеска имаме нешто посебно. Специјално за „Колибри“, Бистрица Миркуловска, најстарата, но вечно млада писателка за деца и возрасни напиша своја азбука, во која ги употреби убавите наши женски имиња. Азбуката на писателката Миркуловска ја инспирира седумгодишната Аника Златкова, ученичка во 2-б одделение во ООУ „Кирил Пејчиновиќ“ во Скопје, да нацрта прекрасни цртежи
Мојата азбука: Бистрица Миркуловска, писателка
А – Ангела – господово ангелче.
Б – Билјана – платно белела.
В – Ведрана – небесна синевина.
Г – Гордана – горда Македонка.
Д – Дениција – ден разденина.
Ѓ – Ѓурѓица – пред Ѓурѓовден родена.
Е – Елена – игроорка весела*.
Ж – Жана, Снежана – белучка, кокиче.
З – Зорана – зора огреана.
Ѕ- Ѕвездана – сјајна ѕвездичка.
И – Илина – храбра илинденка.
Ј – Јаглика – пролет навестува.
К – Калина – шеќерна калинка.
Л– Лилјана – бел цвет, убавина.
Љ – Љубица – љубена, љубов дарува.
М – Марија – Богородица мајчица.
Н- Невена – невенливо невенче.
Њ – жалам, таа е безимена.
О – Огнена – во очите жарчиња.
П– Петранка, Петра – карпа стамена.
Р – Радица, Рада – бистра радика.
С– Солзица – солза радосница.
Т – Темјана – темјанушка мирисна.
Ќ – Ќание – со ќеркичка гушната.
У – Угра мајка – од поетот воспеана. * *
Ф – Фења – другарка сум имала.
Х – Христина – од Христа бога дарена.
Ц – Цветанка, Цвета – цветна градина.
Ч – Черешна – се од корен корнела.
Џ – Џемиле – на ѓерѓеф со свила везела.
Ш – Шахрија – чудесно пеела.
Секогаш со добра мисла
Кон крајот на минатата недела ми заѕвони телефонот, се израдував кога го слушнав пријатниот глас на писателката Бистрица Миркуловска. Ми рече: „Напишав азбука за твојата рубрика во ’Колибри‘, ајде пишувај“. Зедов лист и пенкало, а таа почна да ми диктира без да застане. Мислев дека чита, но професорката ми одговори дека говори наизуст. И, еве ги нејзините стихови создадени специјално за „Колибри“, на што сме ѝ многу благодарни.
Со своите 92 години, Бистрица Миркуловска е најстара писателка во Македонија, но нејзината мисла сѐ уште е бистра, како и нејзиното име, а духот вечно млад. Ѝ посакуваме добро здравје и повторно да нѐ израдува со нова творба, бидејќи низ сите нејзини години на плодно литературно творештво, таа е голем пријател на децата, на детскиот литературен фестивал „Ракатки“, како и на нашиот додаток „Колибри“.
Нашата истакната писателка и професорка Бистрица Миркуловска е родена на 14 март 1930 година во Скопје. Со творбите на оваа плодна авторка, раскрилени по читанките и во книгите пораснаа и растат многу генерации.
Завршила Филозофски факултет на универзитетот „Кирил и Методиј“ во Скопје, а постдипломски студии од областа на македонистиката. Била професорка на Филолошкиот факултет во Скопје и лекторка по македонски јазик и литература на Масариковиот универзитет во Брно, Чешка.
Членка е на Друштвото на писателите на Македонија од 1971 година. Во претседателството на ДПМ била членка од 2000 до 2002, а била и претседателка на Комисијата за активности на писателите за деца. Авторка е на голем број книги поезија, раскази, романи, хаику, поезија, романи и раскази за деца. Незаборавни се песните за деца како што се „Работливо момиче“, „Дедо Снешко зимски цар“ и многу други, а некои од нив се отпеани и на детските музички фестивали.
Од творештвото за деца на оваа мошне плодна авторка ќе ги споменеме книгите: „Цвеќенца“, „Градинче“, „Првачиња“, „Празнични виделини“, „Виножито“, „Сите деца мили“, „Ѕвездена“, „Виделина“, „Клучарчиња“, „Тополите на крајот од дедовата ливада“, „Лице и опачина“, „Цвеќе на мирот“ и „Далечни проблесоци“.
Бистрица Миркуловска е плодна и како преведувачка од македонски на словенечки и од словенечки на македонски јазик, а за преведувачката дејност со опус од дваесет и две книги е наградена со „Потокарова повелба“ од Сојузот на книжевните преведувачи на Југославија, „Златно перо“ и „Кирил Пејчиновиќ“ на Сојузот на книжевните преведувачи на Македонија и „Златно перо“ на СКП на Македонија во 2008 година за преводот на романот „Капелан Мартин Чедрмац“ од Франце Бевк.
Добитничка е на повеќе награди за поезија доделени од Друштвото на писателите на Македонија и од Здружението на просветни работници-литературни творци на Македонија, кое ѝ додели и награда за животно дело. Последниве неколку години е фокусирана на поезијата за возрасни и објавува книги од овој жанр. За поетската збирка „Фатаморгана“, ДПМ во 2017-та на Миркуловска ѝ ја додели наградата „Даница Ручигај“.
М.Т.
