На глобално ниво, модната индустрија користи доволно вода за да наполни 37 милиони олимписки базени годишно. Една нова студија го квантифицира доброто што можеме да го направиме со купување облека од втора рака.
Ако купите само еден пар од вашите омилени фармерки и маичка од втора рака, заштедувате еквивалент на 20.000 стандардни шишиња вода. Анализата на добротворната организација покажува дека е потребен еквивалент на 5.400 стандардни шишиња вода од 500 мл за да се произведе памучна маица. Тоа е доволно за да се задоволат потребите за пиење на 1.600 луѓе во еден ден, според стандардите. Потребни се 16.000 шишиња вода за производство на фармерки – доволно за хидратација на 4.750 луѓе дневно.
– Од овие статистики е јасно дека се „давиме“ во модата. Бидејќи светот се соочува со недостиг од свежа вода поради климатските промени, трошоците за производство на облека и потрошувачката на вода би можеле значително да се намалат ако купуваме производи од втора рака – вели директорката на малопродажбата на „Оксфам“, Лорна Фалон.
Зошто модната индустрија троши толку многу вода?
Модата е жеден бизнис низ целиот синџир на снабдување – од одгледување природни влакна (особено памук) до боење ткаенини и перење алишта. Вкупниот воден отпечаток на облеката што се користи во Обединетото Кралство е осум милијарди кубни метри годишно, забележува „Оксфам“. Тоа е доволно за да се задоволи потрошувачката на вода на целото население на Обединетото Кралство за две години.
На глобално ниво, модната индустрија користи 93 милијарди кубни метри вода годишно – доволно за да се наполнат 37 милиони олимписки базени.
И покрај овој огромен воден печат, постои и голем проблем со транспарентноста. Огромното мнозинство (90 проценти) модни брендови не откриваат никакви ризици поврзани со водата во нивните документи, според неодамнешниот извештај на непрофитната организација „Планет тракер“.
Кога купувате од втора рака, можете да најдете нешто уникатно
Од 2019 година, септемвриската кампања за половна облека на „Оксфам“ ги охрабрува луѓето да го продолжат животот на облеката со купување во добротворни продавници и со донирање на нивната облека.
– Со рециклирање на нашата облека – купување, носење и донирање користена облека – можеме да помогнеме да се намали побарувачката за нова облека. И ова за возврат може да помогне да се намали штетата на нашата планета – објаснува Фалон.
Британската ТВ-водителка и актерка Кет Дили ја предводи годинашната кампања и е голем поборник за оваа практика.
– Каде и да одам во светот, секогаш посетувам продавници за половна облека и одам во лов на најубавите парчиња. Ми се допаѓа што кога купувате од втора рака, можете да најдете нешто сосема уникатно, нешто што никој друг го нема, што можете да го приспособите и да се чувствувате навистина добро кога го носите, знаејќи дека парите отишле за добра цел и дека на таа облека ѝ давате втора шанса за живот – вели таа.
