- Ова ќе биде сосема нов формат на СП во шах, организиран од Норвешкиот шах и одобрен од ФИДЕ. Визијата е да се пронајде шахистот што најдобро ги совладува трите дисциплини комбинирано, во т.н. забрзан класик (иновација од класичниот шах, со временско ограничување од 45 минути плус 30 секунди), забрзан и во брз шах. „Со турнејата Светско првенство во тотален шах, им даваме на играчите нова титула за која ќе се натпреваруваат, а на публиката побрз формат на турнирот. Се надеваме дека турнирот може да ги одушеви и постојните љубители на шахот и новата публика“, вели претседателот на ФИДЕ, Дворкович
Новото светско првенство, насловено Светско првенство во тотален шах, ќе се состои од четири настани секоја година и ќе крунисува комбиниран шампион во три дисциплини, во т.н. забрзан класик, забрзан и во брз шах, пишува Светската шаховска федерација (ФИДЕ). Ова ќе биде сосема нов формат на СП во шах, организиран од Норвешкиот шах, кој е официјално одобрен од ФИДЕ. Турнејата на светските првенства во тотален шах ќе крунисува целосен шампион во три дисциплини: забрзан класик, забрзан и во брз шах. Победникот ќе биде крунисан како светски комбиниран шампион на ФИДЕ.
– Очекуваме ова да стане еден од најпрестижните настани во целиот шаховски календар – вели Кјел Мадланд, извршен директор на Норвешкиот шах и на новото првенство.
Турнејата ќе се состои од четири турнири годишно во различни градови во светот. Минималниот годишен награден фонд е 2,7 милиони долари за целата турнеја (750.000 долари по настан за првите три турнири, а 450.000 долари за финалето), плус бонуси за перформанси. Пилот-турнирот е планиран за наесен во 2026 година, а првата целосна сезона на шампионатот е во 2027 година.
Иницијативата доаѓа од организаторите на престижниот турнир во Норвешка, а официјалниот договор за статус на Светско првенство беше потпишан со ФИДЕ во почетокот на октомври. Визијата на турнејата на тоталното Светско првенство е да се пронајде шахистот што најдобро ги совладува овие три дисциплини, комбинирано. Забрзан класик е иновација од класичниот шах, со временско ограничување од 45 минути плус 30 секунди по секој потег. За овој турнир ќе се добива рејтинг како во класичен шах.
– Бараме „целосен шахист“, разновиден, тактички интелигентен и технички вешт спортист што беспрекорно се приспособува на повеќекратни временски контроли – вели Мадланд.
Турнејата ќе се одржи во различни градови низ целиот свет и за време на последната станица ќе биде крунисан вкупниот победник, официјалниот светски шампион во комбинација на ФИДЕ. Пилот-верзијата од еден турнир ќе почне во текот на есента во 2026 година, за да се тестира новиот формат на турнејата, а целосниот официјален турнир ќе следува во 2027 година.
– Сакаме да создадеме забавен турнир користејќи најсовремена технологија, иновативни и привлечни ТВ и стриминг-преноси и побрзи формати за да го отвориме шаховскиот спорт за пошироката публика од кога било досега. Очекуваме ова да стане еден од најпрестижните настани во целиот шаховски календар. Многу сме почестени од силната доверба што ФИДЕ ја покажа во проектот. Од самиот почеток, федерацијата беше активен и ангажиран партнер, осигурувајќи се дека проектот е усогласен со визијата и стандардите на ФИДЕ. Сакаме да им се заблагодариме, а особено на претседателот на ФИДЕ за нивната блиска вклученост и поддршка – рече Мадланд.
Претседателот на ФИДЕ, Аркадиј Дворкович, изразува силна поддршка за оваа иницијатива.
– Секогаш бараме начини за иновации и поместување на границите на тоа што може да биде шахот, иако е веќе една од најпопуларните игри во светот, неговиот потенцијал за раст уште е огромен. Со турнејата „Светско првенство во тотален шах“, им даваме на играчите нова титула за која ќе се натпреваруваат, а на публиката побрз формат на турнирот и се надеваме дека турнирот може да ги одушеви и постојните љубители на шахот и новата публика. Ова го гледаме како одличен додаток на традиционалното и престижно Светско првенство во шах, каде што го крунисуваме неоспорниот шампион на класичниот шах. Првенствата ќе се дополнуваат едни со други и ќе понудат уште поголемо возбудување за гледачите. Ова не е краткорочна иницијатива туку долгорочен договор помеѓу ФИДЕ и Норвешкиот шах – вели Дворкович, пренесе Светската шаховска федерација.
Основан во 2013 година, Норвешкиот шах брзо стана дел од елитниот шаховски календар. Се смета за еден од најпрестижните и најиновативни меѓународни шаховски турнири во светот. Настанот помогна во професионализацијата на шахот, третирајќи го како модерен спорт и одржлив комерцијален производ. Норвешкиот шах го воведе првиот женски турнир во светот со награден фонд еднаков на отворените секции, пишува ФИДЕ.
Светската шаховска федерација, пак, е управно тело на шаховскиот спорт и ги регулира сите меѓународни шаховски натпревари. Во 1999 година беше признаена од Интернационалниот олимписки комитет (ИОК) како глобална спортска организација. Првично основана во 1924 година во Париз под мотото „Ние сме едно семејство“, ФИДЕ беше една од првите меѓународни спортски федерации, заедно со управните тела на спортовите фудбал, крикет, пливање и автотрки. Сега е една од најголемите, опфаќајќи 201 земја како придружни членки, во форма на национални шаховски федерации. Г.И.
