Како што старееме, нашиот имунолошки систем слабее, првенствено затоа што тимусот го намалува производството на таканаречените Т-клетки што нѐ бранат од патогени. Овие клетки, кои се борат против нападите на телото, стануваат сѐ помалку на број и помалку разновидни, па по 50-та година, важно е да се работи повеќе на имунитетот.
Неопходно е да го зголемите количеството овошје и зеленчук што го јадете, поради антиоксидантите што го зајакнуваат имунолошкиот систем. Додадете брокула, бобинки и агруми полни со витамин Ц, кој помага во производството на бели крвни зрнца и е важен за борба против инфекции. Вклучете пробиотска храна како јогурт и киви во вашата исхрана.
Стресот има негативно влијание врз здравјето, а доколку е од хронична природа го уништува имунитетот. Затоа е добро да правите вежби за дишење, да се занимавате со медитација и да користите адаптогени билки како ашваганда. Ова го намалува нивото на хормонот кортизол и го зајакнува имунитетот. Јогата, таи чи и пешачењето ја подобруваат циркулацијата, ги намалуваат воспалителните процеси и ја поддржуваат детоксикацијата, а сето тоа е корисно за имунитетот.
Многу луѓе имаат дефицит на витамин Д, за што не се ни свесни, а неговата важност стана особено јасна за време на епидемијата на коронавирусот. Затоа е добра идеја да ја проверите вашата состојба со тест на крвта и да земате додатоци за да бидете сигурни дека имате доволно од него. Од големо значење е и престојот на сонце во умерени количества и во време кога има најмалку штетни зраци.
За време на спиењето, телото се регенерира и закрепнува и станува поподготвено да се бори против инфекциите. Идеално, би требало да си легнете пред 22 часот, бидејќи најдобриот сон за закрепнување е до полноќ. Се препорачува да спиете помеѓу седум и девет часа. И на крајот, поминете време со пријателите и семејството. Дружењето со пријателите и членовите на семејството е клучно за менталното здравје, а позитивно влијае и на физичкото здравје. Задоволството влијае на имунитетот и нѐ прави посилни во борбата против болестите.
