Клучни поенти од вчерашниот говор на претседателот на САД во Давос
- Говорот на Трамп во Давос ја потенцира неговата визија за глобалната економија и меѓународната политика, повторно истакнувајќи ја потребата од силни сојузници и стратегиски енергетски иницијативи
Американскиот претседател Доналд Трамп на Светскиот економски форум во Давос во својот вчерашен говор гласно и многу прецизно изрази сериозни критики кон тековните политики во Европа и ја потенцираше улогата на САД како водечка економска сила.
– Можеме да се расправаме за тоа, но нема расправии. Пријателите доаѓаат од различни места, не сакам никого да навредам, но Европа не оди во вистинската насока – рече Трамп, нагласувајќи дека сака „да ја види Европа како оди добро“.
Тој посочи дека САД „многу се грижат“ за Европа, спомнувајќи го своето шкотско и германско потекло и истакнувајќи дека прашањата за енергија, трговија, имиграција и за економски раст се клучни за силен и обединет Запад.
– Европа се уништува себеси. Сакаме силни сојузници, а не сериозно ослабени – додаде Трамп.
1. За енергетските предизвици
Во делот за енергетската политика, Трамп го потенцираше значењето на нуклеарната енергија.
– Влегуваме силно во нуклеарната енергија. Напредокот во безбедноста е неверојатен, а цените ќе бидат подобри и многу безбедни – нагласи американскиот претседател.
Тој повторно ги критикуваше зелената енергија и одлуката за прекин на дупчењата во Северно Море.
2. За Гренланд
Претседателот на САД исто така го искажа својот став за Гренланд, тврдејќи дека „тоа е наша територија“ и дека САД треба да започнат итни преговори за повторно разгледување на можноста за аквизиција на островот.
3. За Венецуела
Трамп зборуваше и за Венецуела, тврдејќи дека земјата ќе се справи „фантастично добро“ под контрола на САД и дека американските нафтени компании ќе бидат вклучени во нејзината економска рехабилитација. Тој ја пофали администрацијата на привремената претседателка Делси Родригез за соработката со американските власти.
4. За САД како „генератор на светскиот прогрес“
– САД се економскиот мотор на планетата. Кога Америка цвета, целиот свет цвета – рече Трамп, додавајќи дека, по економските чекори на САД, „светот треба да нѐ следи долу и нагоре“.
Говорот на Трамп во Давос ја потенцира неговата визија за глобалната економија и меѓународната политика, повторно истакнувајќи ја потребата од силни сојузници и стратегиски енергетски иницијативи. Р.С.
Руски претставник за првпат во Давос по 2022 година: Кирил Дмитриев најавува средби со тимот на Трамп
Од Давос исклучително значаен дипломатски сигнал за мир
По речиси три години отсуство на Светскиот економски форум во Давос (ВЕФ), за првпат од почетокот на руско-украинската војна ќе присуствува руски претставник. Станува збор за Кирил Дмитриев, еден од клучните доверливи соработници на рускиот претседател Владимир Путин и главен комесар за преговорите за мировниот план за Украина.
Светскиот економски форум во март 2022 година ги замрзна формалните односи со руски субјекти и поединци и оттогаш не упатуваше покани до руски функционери или компании. Затоа, присуството на Дмитриев во Давос се смета за значаен дипломатски сигнал.
Според „Евроњуз“, Дмитриев за време на форумот ќе оствари средби со членови на тимот на американскиот претседател Доналд Трамп, кој оваа недела пристигна во Давос со најголемата американска делегација во историјата на самитот. Овие контакти, според аналитичарите, дополнително ги отвораат прашањата околу можниот мировен договор меѓу САД и Украина.
Како извршен директор на Рускиот фонд за директни инвестиции (РДИФ) и дел од тесниот внатрешен круг на Путин, Дмитриев има клучна улога во обидите на Москва да ја претстави својата визија за завршување на војната во Украина пред Вашингтон. Роден во Киев и образован во САД, тој долго време важи за главен канал за комуникација меѓу Кремљ и американските власти.
Дмитриев бил главен архитект на мировен план од 28 точки за Украина, кој во западните и украинските кругови бил оценет како неповолен и блиску до капитулација на Киев. Подоцна, планот бил скратен на околу 20 точки за време на преговорите меѓу Трамп, западните сојузници и Украина.
Се очекува главниот преговарач на Трамп, Стив Виткоф, исто така да биде во Давос, заедно со државниот секретар на САД, Марко Рубио, и Џаред Кушнер, инвеститор во недвижности и зет на американскиот претседател. Според медиумските извештаи, Дмитриев ќе има одделни средби и со Виткоф и со Кушнер.
Дмитриев присуствуваше и на самитот меѓу Доналд Трамп и Владимир Путин, одржан во Алјаска на 15 август минатата година, што дополнително ја нагласува неговата улога во неформалната дипломатија меѓу Москва и Вашингтон. Р.С.
Фон дер Лајен од Давос:
Политичкиот развод меѓу ЕУ и САД е траен, Европа мора да се подготви за нова реалност
Претседателката на Европската комисија, Урсула фон дер Лајен, во својот говор на Светскиот економски форум во Давос испрати недвосмислена порака за иднината на односите меѓу ЕУ и САД, оценувајќи дека таканаречениот политички развод меѓу двете страни на Атлантикот „не е привремен, туку траен процес со долгорочни последици“.
Фон дер Лајен двапати ја повтори формулацијата за „политички развод“, нагласувајќи дека станува збор за структурна промена во трансатлантските односи, а не за минливо недоразбирање или моментална политичка криза. Според неа, Европа мора да прифати дека враќање на старите модели на партнерство нема да има брзо и дека новата реалност ќе носи економска и политичка цена што „на крајот сите ќе мора да ја платиме“.
Во центарот на нејзиниот говор беше критиката на трговските политики и на политиките на санкции, кои таа ги оцени како „голема грешка“, особено кога доаѓаат од страна на традиционални сојузници. Без директно именување, пораката јасно се однесуваше на американските мерки што ги погодуваат европската економија и индустрија.
Притоа, претседателката на Европската комисија јасно го дефинираше пристапот на ЕУ, користејќи три клучни збора за евентуалниот европски одговор: пропорционален, непоколеблив и обединет. Со ова таа порача дека ЕУ нема да реагира импулсивно и нема да отстапи од заштитата на сопствените интереси, инсистирајќи на единствен настап на сите земји членки.
Иако потенцираше дека европските граѓани и американскиот народ остануваат блиски и пријателски поврзани, Фон дер Лајен направи јасна разлика меѓу вредносното партнерство и актуелните политички одлуки. Според неа, новите околности бараат Европа да развие поголема стратешка автономија – економска, индустриска и политичка – без целосно раскинување на врските со Вашингтон, но и без наивно потпирање на старите гаранции.
Говорот во Давос беше оценет како еден од најотворените настапи на Фон дер Лајен досега во однос на САД, со јасна порака дека ЕУ влегува во период на преиспитување на својата позиција во глобалниот поредок. Наместо автоматско следење на трансатлантските политики, Брисел, според нејзините зборови, ќе мора самостојно да ги дефинира своите приоритети и црвени линии.
Со тоа, Давос оваа година не беше само форум за економски визии туку и сцена на која беше отворено признаено дека односите меѓу ЕУ и САД влегуваат во нова, посложена и понеизвесна фаза. Р.С.
Британскиот премиер нема намера да дојде во Давос!?
Стармер од Лондон ретерира кон мирен пристап во односите со САД
Британскиот премиер Кир Стармер сè уште не планира да присуствува на Светскиот економски форум во Давос, потврди британскиот министер за енергетика Ед Милибанд.
Во изјава за „Би-би-си“, министерот Милибанд објасни дека премиерот има други обврски, но дека е подготвен да разговара со американскиот претседател Доналд Трамп на свој начин.
– Тој имаше мирен пристап. Бараше заедничка основа со претседателот на Соединетите Американски Држави и ја најде таа основа – рече Милибанд, додавајќи дека токму таквиот пристап доведе до првиот трговски договор меѓу двете земји.
Британскиот министер Милибанд нагласи дека премиерот Стармер е подготвен да ја изрази својата несогласност кога е потребно, како што го направи тоа во врска со Гренланд.
– Мислам дека мирното водство е она што ни треба – додаде министерот. Тој исто така повика на деескалација на тензиите со САД, нагласувајќи дека одмаздничките царини не се рационален пат напред.
– Треба да работиме на безбедноста на Арктикот заедно со нашите сојузници, да разговараме со САД и да најдеме пат напред што не вклучува трговски војни, туку соработка – заклучи Милибанд. Р.С.
